विजय अधिकारी\ टोरन्टो, क्यानडा – मे १९, २०२४
क्यानडाको प्रसिद्ध अनि ठुलो शहर टोरोन्टो, दिनभरीको थकान मार्ने क्रममा थियो, त्यत्तिकैमा गुञ्जियो ” मेरो टोपी कैलाशको शिर जस्तो, मेरो टोपि हिमाली भिर जस्तो । “,नेपाली खानाको स्वाद सङ्गै नेपाली सङ्गितप्रेमि मनहरुको उत्साहजनक सहभागिता अनि अति आनन्ददायि साङ्गितिक माहोलबिच हिजो मे १८, टोरोन्टोमा ” गोपाल योञ्जन स्मृति साझ” सम्पन्न भएको छ।
कार्यक्रममा स्कारबोरो र टोरन्टोका नेपाली बासिन्दाहरूको ठूलो सहभागिता देखिएको थियो। सहभागीहरूले संगित, खाना र साथीभाइसँगको रमाइलो वातावरणमा रमाउँदै सांगीतिक साँझको भरपुर आनन्द उठाएका थिए। योञ्जनका कालजयी गीतहरू गुञ्जिदा सबैजना मन्त्रमुग्ध भएर झुमेका थिए।
कार्यक्रममा “बनेको छ पहराले यो छाती मेरो,” “कान्छी हे कान्छी,” “गल्ती हजार हुन्छन्,” “मखमली चोलो चाहिँदैन,” “यति चोखो यति मिठो दिउँला तिमिलाई माया” जस्ता लोकप्रिय गीतहरू प्रस्तुत गरिएका थिए। यी प्रस्तुतिहरूलाई दर्शकहरूले जोसिलो तालिले र हृदयदेखि सराहना गरेका थिए।
कार्यक्रमको संयोजक मोहन थापाले गरेका थिए भने व्यवस्थापन समितिमा बसन्त थापा, दिपेन राउत क्षेत्री, लक्ष्मण पाण्डे, रोशन बोहोरा, सुरेश गौतम, विदुर के सि, उमेश प्रधान, रविन्द्र घिमिरे लगायतका सदस्यहरूको सक्रिय भूमिका थियो। उनीहरूको सहयोगले कार्यक्रम भव्य अनि सभ्य रुपमा सम्पन्न भएको थियो।
सहभागीहरूले परम्परागत नेपाली खानपानको पनि मजा लिँदै कार्यक्रमको रमाइलो वातावरणलाई थप सुन्दर बनाएका थिए। कार्यक्रमको सफलताले मात्र मनोरञ्जन मात्र होइन, महत्वपूर्ण उद्देश्य पनि पूरा गर्यो: अन्तर्राष्ट्रिय स्तरमा नेपाली संस्कृति प्रवर्द्धन र संरक्षण गर्नु।
साँझको सांगीतिक र सांस्कृतिक प्रशंसाले सबैमा गहिरो छाप छोड्न सफल भएको थियो। कार्यक्रमपछि सहभागीहरूले कलाकारहरू र कार्यक्रमको समग्र व्यवस्थापनको प्रशंसा गर्दै, योञ्जनको सांगीतिक प्रतिभाको सारलाई उत्कृष्ट रूपमा प्रस्तुत गरेको बताए। क्यानडामा नेपाली वाध्यबादनहरुको प्रबर्द्धनमा लामो समय देखि योगदान पुर्याउँदै आएका सानुराजा महर्जनले कार्यक्रम सफलतापूर्वक सम्पन्न भएकोमा खुसी व्यक्त गर्दै यस्ता कार्यक्रमहरुले नेपाली संगीत उद्योगको स्तरउन्नति हुनेमा विश्वास व्यक्त गरेका थिए ।
गोपाल योञ्जनलाई श्रद्धाञ्जली अर्पण गरिएको यस कार्यक्रममा नेपाली संगीतलाई मात्र होइन, विदेशमा रहेका नेपाली समुदायको सांस्कृतिक सम्बन्धलाई पनि पुनः बलियो बनाएको थियो। यो कार्यक्रमले नेपाली संस्कृति विभिन्न भागहरूमा जीवित र फस्टाउँदै राख्ने प्रयासलाई उजागर गरेको थियो।
