विजय अधिकारी\ टोरोन्टो २३ मे
क्यानडाकाे स्कारबोरो, टोरोन्टोमा अवस्थित पशुपतिनाथ तथा बुद्ध मन्दिरले बिहिबार आफ्नो भवन परिसरमा पहिलो पटक आज २५६८ औं बुद्ध जयन्ती मनाएको छ। आज बिहान बुद्धको पुजा आरधना सम्पन्न गरिएको र सन्ध्याकालमा पनि बुद्ध महिमा प्रवचन गरिएको थियो। भगवान गौतम बुद्धले विश्व शान्ती स्थापना गर्न पुर्याएको योगदानको स्मरण गर्दै हरेक वर्ष बुद्ध जयन्ती मनाउने चलन छ। उक्त मन्दिरले सञ्चालन गरेको समारोहमा बौद्धमार्गी इन्द्र तामाङ्ले कार्यक्रम सहजीकरण गर्नुभएको थियो। कार्यक्रममा सामाजिक संघ संस्थाका प्रतिनिधिहरु, बुद्धिजिविहरु र भक्तजनहरुको उत्साहजनक उपस्थिति रहेको थियो।
स्कारबोरोमा बसोबास गर्दै आउनुभएका नेपाली समुदायका विभिन्न वक्ताहरुले बुद्धको ज्ञानको महिमा र आवस्यकताको बारेमा आफ्नो भनाई राख्नुभएको थियो। भनाई राख्नेहरुमा बौद्ध मार्गी ईन्द्र तामाङ , नेपाल साहित्य समाजका खेम गुराँगाई, साहित्यकार रबिन थपलिया, गुरु श्याम प्रसाद खनाल, केदार बस्नेत, , प्रदिप पौड्याल, र रबिन्द्र घिमिरे रहनुभएको थियो। यसका साथै मन्दिरले गर्ने बुद्ध महिमा र महत्व सम्बन्धित आगामी कार्ययोजनाको बारेमा मन्दिरका अध्यक्ष श्रीमति अरुणा पौड्याल र सचिव निल पौड्यालले प्रष्ट पार्नुभएको थियो।
त्यसैगरि कार्यक्रम समारोहमा बुद्धको उपदेशको स्मरण गर्दै पाँच मिनेट ध्यान अभ्यास पनि गरिएको थियो। यसका साथै ॐ शब्दको प्रभाव दर्शाउदै दश मिनेटसम्म यसको उच्चारण गर्ने कार्य पनि सम्पन्न भएको थियो।
पुजा र कार्यक्रम पश्चात प्रसाद अनि फलफूल वितरणका साथै जगन्नाथ खनालको नेतृत्वमा बुद्ध ज्ञान सम्बन्धी भजन गरिएको थियो। कार्यक्रम भव्यरुपमा सम्पन्न भएको थियो। आगामी वर्षहरुमा अझै राम्रो व्यवस्थापनका साथै यस्ता सान्स्कृतिक कार्यक्रम आयोजना गर्ने मन्दिर व्यबस्थापन समितीले बताएको छ। बुद्ध पुजालाई प्रभावकारी बनाईदिनुहुनेमा इन्द्र तामाङ, प्रसाद प्रयायोजन गरिदिनुहुनेमा केदार बस्नेत, पुजा व्यबस्थापन गरिदिनुहुनेमा रबिन्द्र घिमिरे ज्यु हरुका साथै समारोहको सफल सम्पन्न गर्नुहुनेमा सबै भक्तजन र स्व्यम्सेवकहरु रहनुभएको थियो।
