आईसीसी टी–२० विश्वकप अन्तरगत आज शनिवार नेपाल र दक्षिण अफ्रिका विच प्रतिस्पर्धा हुँदैछ । भर्खरै टस जितेको नेपाली टोली शनिवार विहान नेपाली समय अनुसार विहान ५ बजेर १५ मिनेटमा सेन्ट भिन्सेन्टको किङ्सटाउन स्थित आर्नोस भेल स्टेडियममा हुने खेलका लागि नेपाल दक्षिण अफ्रिका विरुद्ध प्रतिस्पर्धामा उत्रिएको हो ।
१८ हजार दर्शक क्षमताको आर्नोस भेल स्टेडियममा यस पटक सन्दिप लामिछाने सहित नेपाली टिम मैदानमा उत्रदैं छ । अमेरिकाले भिषा नदिएपछि अघिल्ला दुई खेलमा प्रभावशाली खेलाडी सन्दीप लामिछाने सहभागी हुन पाएका थिएनन् । आजको खेलमा सन्दिपलाई देख्न पाउने भएपछि विभिन्न देशमा रहेका नेपाली खेल हेर्नका लागि घण्टौं देखी अनलाईन बसेका छन् ।
नेपालले जारी विश्वकपको पछिल्ला दुई खेल भने क्यारेबियन राष्ट्रमा खेल्दैछ । जसमा सन्दिपको खेल हेर्न पाईने छ । पछिल्ला दुई खेल खेल्न एक साताअघि नै वेस्ट इन्डिज पुगिसकेका सन्दिप दक्षिण अफ्रिकाविरुद्धको खेलका बलियो आसा पनि हुन् ।
समूह ‘डी’ मा रहेको नेपाल र दक्षिण अफ्रिका विचको यस खेल विश्वकप यात्राको प्रवेशद्वारका रुपमा देखिएको छ । टी–२० अन्तर्राष्ट्रिय वरीयतामा ७ औं स्थानमा रहेको दक्षिण अफ्रिकालाई पराजित गर्न सके मात्र नेपालको बाँकी यात्रा तय हुनेछ । प्रतियोगिताको ‘सुपर–८’ चरणमा पुग्ने सम्भावना यसै खेलले निर्धारण गर्ने भएकाले पनि शनिबारको खेलका लागि नेपालीहरु उत्सुक छन् ।
अङ्क तालिका समीकरण अनुसार वरीयताको १७ औँ स्थानमा रहेको नेपालका लागि दक्षिण अफ्रिका बलियो प्रतिद्वन्द्वी हो ।
यसअघि सन् २०१४ मा सम्पन्न टी–२० विश्वकप खेलेको नेपाली टोली प्रारम्भिक चरणबाटै बाहिरिएको थियो । यद्यपी सो समय नेपालले समूहगत चरणमा तीनमध्ये दुई खेलमा जित हात पारेको थियो ।
नेपाली टोली समूहगत चरणको आफ्नो पहिलो खेलमा नेदरल्यान्ड्ससँग ६ विकेटले पराजित भएको थियो । सो खेलमा टस हारी पहिले ब्याटिङ गरेको नेपालले १९.२ ओभरमा अलआउट हुनुअघि एक सय ६ रनमात्र बनाउन सकेको थियो ।
उमेर समूहको अन्तर्राष्ट्रिय प्रतियोगितामा दुई पटक दक्षिण अफ्रिकालाई हराएको नेपाल विश्वकप यात्रामा खरो उत्रनु पर्ने देखिन्छ । जारी विश्वकपमा नेपालको यसअघिको दुवै खेल अमेरिकामा थियो । अघिल्ला दुईमध्ये एक खेलमा नेपाल पराजित भएको थियो भने एक खेल वर्षाका कारण रद्द भएको थियो ।
