नेकपा एमालेका महासचिव शंकर पोखरेलले नेकपा (माओवादी केन्द्र) का अध्यक्ष प्रचण्डको अशोभनीय अभिव्यक्तिले राजनीतिमा तनावको स्थिति सिर्जना भएको बताएका छन् । बिहीबार सुर्खेत आएका पोखरेलले पत्रकारहरुसंगको कुराकानीका क्रममा सत्ताबाट बाहिरिएका प्रचण्डको यस्तो बताएका हुन् ।
पछिल्लो समय संसदभित्र अराजनीतिक गतिविधि भइरहेको बताएका पोखरेलले सत्ता परिवर्तनपछि प्रतिपक्षको भूमिकामा रहेको माओवादीले संवेदनशिलता र संसदीय मर्यादाको ख्याल नगर्दा अराजक वातावरण सृजना भएको आरोप लगाएका हुन् ।
प्रतिपक्षीले श्रीलंका र बंगलादेशको उदाहरण दिँदै हिँड्नु लोकतान्त्रिक अभ्यास हुन नसक्ने तर्क सहित पोखरेलले यसतर्फ ध्यानाकर्षण समेत गराएका छन् ।
संविधान सुदृढ गर्नका लागि सबै राजनीतिक दललाई साथमा लिएर अगाडि बढ्ने कुरामा एमाले सकारात्मक रहेको बताएका महासचिव पोखरेलले देशलाई आर्थिक संकटबाट बाहिर निकाल्न उद्यमशिलतालाई जोड दिनुपर्ने र यसका लागि सरकारले काम गरिरहेको जानकारी पनि दिएका छन् ।
