सुष्मा देवकोटा \ काठमाडौं, १८ जेठ
राष्ट्रिय सरोकार मन्चले दिवंगत राज परिवार सदस्यको सम्झनामा दिप प्रज्वलन गर्ने भएको छ । मञ्चले दिवंगत राज परिवार सदस्यको सम्मान र सम्झना हेतु भोली सोमबार साँझ ६:३० बजे काठमाडौंको कमलादी स्थित गणेश मन्दिर परिसरमा दिप प्रज्वलन कार्यक्रम राख्ने भएको हो ।
राष्ट्रिय सरोकार मञ्चका अध्यक्ष सोम बिक्रम सिंहले रिपोटर्स क्लव अमेरिकालाई दिएको जानकारी अनुसार अनुसार वि.सं.२०५८ साल जेठ १९ गते साँझ अकल्पनिय रुपमा देशलाई गम्भिर क्षति हुनेगरि भएको अप्रिय घटनाको स्मरण गर्दै दिवंगत राज परिवार सदस्यको महत्वपूर्ण योगदानको सम्मान र सम्झनामा ‘स्मृति सन्ध्या’का रुपमा दिप प्रज्वलन कार्यक्रम आयोजना हुन लागेको हो ।
सुरुमा यस कार्यक्रम नारायण हिटी दरवारभित्र रहेको चतुरव्यूह नारायण मन्दिरमा गरिने तयारी रहेको थियो । तर गृहमन्त्रालयले नारायणहिटी आसपासका क्षेत्रमा निषेधाज्ञाको घोषणा गरेपछि काठमाडौंको अर्को शिर्ष शक्तिपिठ कमलादीको गणेश मन्दिर परिसरमा दिप प्रज्वलनको कार्यक्रम राखिने भएको हो ।
