राम प्रसाद अधिकारी , टेक्सास
अमेरिकाको भ्रमणमा रहेका राप्रपाका प्रवक्ता तथा नेपालका साहसी र प्रभावशाली नेता ज्ञान बहादुर शाही (ज्ञानेन्द्र शाही)सँग NRNA टेक्सास च्याप्टरको आयोजना तथा पानस अमेरिकाको सहकार्यमा टेक्सासस्थित भेटघाट रेष्टुरेन्टमा अन्तरक्रिया कार्यक्रम सम्पन्न भएको छ।
कार्यक्रमको सभापतित्व NRNA टेक्सास च्याप्टरका अध्यक्ष निलेश श्रेष्ठले गर्नुभयो भने सञ्चालन सचिव रोचक गौतमले गर्नुभयो। उपस्थित अतिथिहरूलाई पानस अमेरिकाका अध्यक्ष रवि रावलले स्वागत गर्नुभयो।
कार्यक्रममा NRNA ICCका महासचिव गौरि राज जोशी, NRNA NCCका उपाध्यक्ष कुमार तामाङ, NRNA ICC सदस्य सोफिन थापा, NRNA NCC सदस्य राजेश अधिकारी, युएनएका संस्थापक अध्यक्ष पासाङ लामा, युलेस सिटीका उप–मेयर टिका पौडेल, नेपाली समाज टेक्सासका अध्यक्ष राजेन्द्र वाग्ले, पत्रकार महासंघ र विभिन्न संघ–संस्थाका प्रतिनिधिहरूको उपस्थिति थियो। करिब १०० भन्दा बढी सहभागी रहेको अध्यक्ष श्रेष्ठले जानकारी दिनुभयो।
अन्तरक्रियामा सहभागीहरूले विविध विषयमा प्रश्न राखे जसका शाहीले आत्मविश्वासका साथ उत्तर दिनुभयो। उनले संविधानका धारा, नेपालको वर्तमान राजनीतिक अवस्था, भ्रष्टाचार, नागरिकता ऐन र गैरआवासीय नेपालीका हकहितबारे धाराप्रवाह र तथ्याङ्कसहित आफ्ना विचार राखे।
शाहीले ठूला राजनीतिक दलहरूले संविधान र ऐन परिवर्तन गरी विकासमा अवरोध पुर्याएको र नेपालमा पालैपालो सत्ता कब्जा गरेर वर्तमान संकट निम्त्याएको आरोप लगाउँदै २०८४ को निर्वाचनमा सही दललाई मतदान गर्न आह्वान गरे। गैरआवासीय नेपाली नागरिकता ‘कागजको खोस्टो’ मात्र भएको टिप्पणी गर्दै प्रवासका नेपालीको सक्रिय भूमिका आवश्यक रहेको बताए।
उनले राजनीतिक परिवर्तनका प्रत्येक चरणमा नागरिकता ऐन आएको ऐतिहासिक तथ्य स्मरण गराउँदै वंशजको नागरिकता खारेज हुनु नहुनेमा जोड दिए। साथै, २०८४ को निर्वाचनमा भौतिक रूपमा नेपाल पुगेर मतदान गर्न उपस्थित सबैलाई आग्रह गरे।
कार्यक्रममा युएनएका संस्थापक अध्यक्ष पासाङ लामा, नेपाली समाज टेक्सासका अध्यक्ष राजेन्द्र वाग्ले लगायतका वक्ताहरूले शाहीको स्पष्ट र सशक्त अभिव्यक्तिको प्रशंसा गरे। उपस्थितहरूले टेक्सासमा नेपाली दूतावासको अफिस स्थापना गर्न उनले खेलाएको भूमिकाको समेत उल्लेख गरे।
