राम प्रसाद अधिकारी टेक्सास, अमेरिका —
नेपाली समाज टेक्सास (NST) को आगामी कार्यकाल (२०२६–२०२७) का लागि नेतृत्व चयनको तयारी सुरु भएसँगै समाजभित्र चर्चा र हलचल तीव्र बनेको छ। यसपटक अध्यक्ष पदका लागि दुई चर्चित नामहरू—बलराम पौडेल (हालका उपाध्यक्ष) र विजय भुषाल (हालका महासचिव)—अग्रपंक्तिमा रहेका छन्।
दुवै जना लामो समयदेखि समाजका जिम्मेवार पदमा रहेर सक्रिय रूपमा काम गर्दै आएका व्यक्तित्व हुन्। दुवैले यसपालि अध्यक्ष पदमा उम्मेदवारी दिने औपचारिक घोषणा गरिसकेका छन्।
यसैबीच, अन्य केही व्यक्तिहरूले पनि उम्मेदवारी दिने तयारी गरिरहेका भए पनि रिपोर्टर्स क्लब टेक्सास मार्फत अहिलेसम्म कुनै आधिकारिक जानकारी सार्वजनिक गरिएको छैन। यसले गर्दा आगामी NST निर्वाचन यसपटक झन् प्रतिस्पर्धात्मक र रोचक हुने अनुमान गरिएको छ।
एक स्रोतका अनुसार, NST सदस्यता नवीकरण र नयाँ सदस्यता लिने अन्तिम मिति नोभेम्बर १५ तोकिएको छ भने उम्मेदवारहरूको औपचारिक घोषणा नोभेम्बर १६ मा गरिनेछ।
बलराम पौडेल र विजय भुषाल दुबैले अघिल्ला कार्यकालमा NSTको महत्वपूर्ण पद सम्हाल्दै उल्लेखनीय योगदान पुर्याइसकेका छन्। समुदायभित्र दुवैजना अनुभवी, सक्षम र जिम्मेवार नेताका रूपमा चिनिएका छन्, जसले नेपाली समाज टेक्सासलाई अझ सशक्त नेतृत्व प्रदान गर्ने अपेक्षा गरिएको छ।
सामाजिक सञ्जालमा हालसम्म देखिएका प्रचार–प्रसारका आधारमा यो समाचार तयार गरिएको हो। तथापि, सो पदमा अन्य केही व्यक्तिहरूको पनि उम्मेदवारी रहने सम्भावना रहेको देखिन्छ।
