राम प्रसाद अधिकारी –
अमेरिकाको टेक्सास राज्यमा बसोबास गर्ने नेपाली समुदाय यतिबेला चुनावी माहोलमा सक्रिय देखिएको छ। नेपाली समाज टेक्सास (एनएसटी) को २०२५–२०२७ कार्यकालका लागि आउँदो डिसेम्बर १३ मा हुने निर्वाचन नजिकिँदै जाँदा विभिन्न प्यानलका उम्मेदवारहरू प्रचार–प्रसारमा जुटेका छन्।
यसै क्रममा अध्यक्ष पदका उम्मेदवार जनक भण्डारीको प्यानलबाट भोला मैनाली (BP) ले कोषाध्यक्ष पदका लागि उम्मेदवारी दिएका छन्। मैनालीले “पारदर्शिता, प्रतिबद्धता र परिणाम” लाई आफ्नो मूल नाराका रूपमा अघि सारेका छन्।
नेपालको बारा जिल्ला, जीतपुरसिमरा उपमहानगरपालिका–१५ डुमरवानामा जन्मिएका मैनाली हाल टेक्सासको फोर्ट वर्थ–ह्यास्लेट क्षेत्रमा स्थायी रूपमा बसोबास गर्दै आएका छन्। गाउँकै विद्यालयबाट प्रवेशिका (एसएलसी) उत्तीर्ण गरेका उनले हेटौंडाबाट स्नातक तह पूरा गरेका हुन्। वित्त र लेखा क्षेत्रमा रुचि बढेसँगै उनले काठमाडौंबाट चार्टर्ड एकाउन्टेन्सी (सीए) अध्ययन गरेका थिए।
हाल मैनाली अमेरिकामा सूचना प्रविधि तथा डेटाबेस क्षेत्रमा कार्यरत छन्। आर्थिक व्यवस्थापनसँगै प्रविधिको प्रयोगमार्फत संस्थाको वित्तीय प्रणालीलाई थप पारदर्शी र प्रभावकारी बनाउने आफ्नो प्रतिबद्धता रहेको उनले बताएका छन्।
उनका अनुसार हाल एनएसटीको प्रमुख आयस्रोत सदस्यता शुल्क र दानमा सीमित छ। निर्वाचित भएमा स्थानीय व्यवसायी, व्यावसायिक समूह तथा विभिन्न संघसंस्थासँग सहकार्य गर्दै आयका नयाँ स्रोत पहिचान र विस्तार गर्ने योजना रहेको मैनालीको धारणा छ।
समुदायमा सशक्त संस्था निर्माणका लागि जिम्मेवार नेतृत्व आवश्यक रहेको उल्लेख गर्दै मैनालीले सबै सदस्यहरूसँग सहयोग र समर्थनको अपेक्षा गरेका छन्।
