राम प्रसाद अधिकारी
ड्यालस, टेक्सस — नेपालको पर्यटन प्रवर्द्धनमा टेवा पुर्याउने उद्देश्यले गैरआवासीय नेपाली संघ (NRNA) संयुक्त राज्य अमेरिकाको व्यापार तथा पर्यटन विभागद्वारा प्रकाशित ‘भिजिट नेपाल–२०२५’ पुस्तकका केही प्रतिहरू नेपाली महाबाणिज्यदूतावास, ड्यालस, टेक्ससलाई हस्तान्तरण गरिएको छ।
एक भेटघाट कार्यक्रमबीच सम्पन्न उक्त कार्यक्रममा महाबाणिज्यदूत सुरेश अधिकारी, उपमहाबाणिज्यदूत धना कुमारी जोशी, वाणिज्यदूत तथा प्रवक्ता प्रवीण भट्टराई र उपवाणिज्यदूत हरिमाया अधिकारीको उपस्थिति रहेको थियो। पुस्तक प्रकाशन टोलीको तर्फबाट गैरआवासीय नेपाली संघ केन्द्रीय कार्यसमिति (२०२३–२०२५) का उपाध्यक्ष नेत्र पाण्डे, सल्लाहकार शैलेश आचार्य, प्रकाशन प्रमुख प्रा. प्रभात दीक्षित, प्रधान सम्पादक बैकुण्ठराज आचार्य तथा अर्जुन कृष्ण बिष्ट सहभागी हुनुहुन्थ्यो।
कार्यक्रममा पुस्तक प्रकाशनको उद्देश्य, लक्षित समूह तथा अमेरिकामा वितरण प्रक्रिया सम्बन्धी जानकारी प्रस्तुत गरिनुका साथै महाबाणिज्यदूतावासबाट प्राप्त हुन सक्ने सहयोगबारे छलफल गरिएको थियो। यस अवसरमा महाबाणिज्यदूत सुरेश अधिकारीले उपलब्ध स्रोत–साधनको सीमाभित्र रहेर हरसम्भव सहयोग गर्ने प्रतिबद्धता जनाउँदै ड्यालस–फोर्टवर्थ क्षेत्रमा रहेका नेपाली सामाजिक संस्थाहरूसँग सहकार्यको आवश्यकता औँल्याउनुभयो।
