राम प्रसाद अधिकारी-
ह्युस्टन, टेक्ससमा सक्रिय नेपाली युवाहरूको खेलकुद संस्था चन्द्र–सूर्य फुटबल क्लब ले नयाँ वर्षको उपलक्ष्यमा नयाँ वर्ष कप फुटबल प्रतियोगिता आयोजना गर्ने घोषणा गरेको छ।
स्थानीय नेपाली युवाहरूलाई खेलकुदमार्फत सक्रिय बनाउने, खेलाडीहरूबीच आपसी समझदारी र भाइचारालाई प्रवर्द्धन गर्ने तथा नेपाली समुदायभित्र एकता मजबुत बनाउने उद्देश्यका साथ प्रतियोगिता आयोजना गर्न लागिएको क्लबले जनाएको छ।
आयोजकका अनुसार उक्त प्रतियोगिता आगामी जनवरी १० र ११, २०२६ मा ह्युस्टनस्थित Cullen Park (Field #7) मा आयोजना हुनेछ। प्रतियोगिताका लागि हालसम्म १० वटा टिमले सहभागिता सुनिश्चित गरिसकेका छन्।
प्रतियोगितामा सहभागी टिमहरूमध्ये च्याम्पियन बन्ने टिमले ट्रफीसहित २,६०० अमेरिकी डलर तथा उपविजेता टिमले ट्रफीसहित १,००० अमेरिकी डलर नगद पुरस्कार प्राप्त गर्नेछन्।
त्यसैगरी प्रतियोगितामा उत्कृष्ट प्रदर्शन गर्ने खेलाडीहरूलाई पनि विशेष पुरस्कार प्रदान गरिनेछ। उत्कृष्ट खेलाडी (MVP), सर्वाधिक गोलकर्ता, तथा उत्कृष्ट गोलकिपर लाई ट्रफीसहित जनही ५०–५० अमेरिकी डलर पुरस्कार प्रदान गरिने आयोजकले जानकारी दिएको छ।
आयोजकका अनुसार यस प्रतियोगिताका लागि तोकिएको पुरस्कार राशि हालसम्म आयोजना भएका समान प्रकृतिका प्रतियोगितामध्ये सबैभन्दा ठूलो रहेको दाबी गरिएको छ।
सन् २०१३ देखि खेलकुद गतिविधिमा संलग्न चन्द्र–सूर्य फुटबल क्लबले आयोजना गर्न लागेको यस प्रतियोगितालाई ह्युस्टनस्थित नेपाली समुदायका विभिन्न व्यवसायी, संघ–संस्था तथा शुभेच्छुकहरूले सहयोग गरिरहेका छन्।
