ड्यालस — युवा तथा खेलकुद मन्त्री माननीय बब्लु गुप्ताको अमेरिका भ्रमणलाई लिएर विभिन्न टिकाटिप्पणीहरू सार्वजनिक भइरहेका सन्दर्भमा सम्बन्धित संस्थाले गम्भीर ध्यानाकर्षण भएको जनाएको छ।
संस्थाले जारी गरेको विज्ञप्तिमा युवा तथा खेलकुद मन्त्री नेपालभित्र मात्र सीमित नभई विदेशमा बसोबास गर्ने नेपाली युवासहित सम्पूर्ण नेपाली समुदायका साझा मन्त्री भएको उल्लेख गरिएको छ। नेपाली डायस्पोरालाई प्रतिनिधित्व गर्ने संस्थाको हैसियतले नेपालको बदलिँदो राजनीतिक–सामाजिक परिस्थिति तथा पछिल्लो Gen-Z आन्दोलन पश्चात् उत्पन्न अवस्थाको सन्दर्भमा, नेपाल सरकारमा Gen-Z को प्रतिनिधित्व गर्दै युवा तथा खेलकुद मन्त्रीको जिम्मेवारी सम्हाल्नु भएका माननीय बब्लु गुप्ता ज्यूलाई अमेरिका आमन्त्रण गरिएको स्पष्ट पारिएको छ।
विज्ञप्तिअनुसार मन्त्री गुप्तालाई “Role of NRNA Youth in the Development of Nepal Post Gen-Z Revolution” शीर्षकमा विचार व्यक्त गर्न तथा नेपाली समुदायसँग अन्तरक्रिया गर्न आमन्त्रण गरिएको हो। सो कार्यक्रमसँग सम्बन्धित सम्पूर्ण खर्च आयोजक संस्थाले नै व्यहोर्ने व्यवस्था गरिएको र यसबाट नेपाल सरकार वा राज्यलाई कुनै आर्थिक भार नपर्ने संस्थाले जनाएको छ।
संस्थाले मन्त्री गुप्ताको अमेरिका भ्रमण तथा कार्यक्रममा सहभागितालाई विदेशमा रहेका नेपाली युवालाई नेपालको विकास प्रक्रियासँग जोड्ने उद्देश्यसहितको बौद्धिक छलफलको पहलका रूपमा व्याख्या गरेको छ। साथै, भ्रमणलाई लिएर फैलाइएका भ्रामक तथा अनर्गल टिकाटिप्पणीहरूको पछि नलाग्न आम नेपाली समुदायलाई हार्दिक अनुरोध गरिएको छ।
