डालस — गैरआवासीय नेपाली संघ (एनआरएनए) अन्तर्राष्ट्रिय समन्वय परिषद् (ICC) मा सम्पन्न बृहत् एकता पश्चात् आगामी फेब्रुअरी २४ देखि २६, २०२६ सम्म आयोजना हुने अन्तर्राष्ट्रिय एकता महाधिवेशनको तयारी तीव्र रूपमा अगाडि बढेको छ।
यसै सन्दर्भमा एनआरएनए राष्ट्रिय समन्वय परिषद् (NCC) अमेरिका अन्तर्गत एकता तथा सहजीकरण समिति र सदस्यता व्यवस्थापन समिति सक्रिय रूपमा कार्यरत रहेका छन्। एकता महाधिवेशनमा सहभागी हुन इच्छुक तथा विगतमा विभिन्न कारणले सदस्यता लिन छुटेका गैरआवासीय नेपालीहरूका लागि सदस्यता पुनः खुला गरिएको एनआरएनए एनसीसी अमेरिकाले जनाएको छ।
आईसीसीको निर्देशनअनुसार सदस्यता संयुक्त रूपमा खुलाउन पहल गरिए पनि अर्को समितिको असहमतिका कारण आईसीसीको निर्णय र विधानअनुसार एनसीसी अमेरिकाले सदस्यता खुलाउने निर्णय गरेको अध्यक्ष बिकाश उप्रेतीले जानकारी दिनुभयो। एनसीसी अमेरिका नेपाल सरकारबाट मान्यता प्राप्त आधिकारिक संस्था भएकाले आईसीसीको विधान र निर्देशनअनुसार अगाडि बढ्नु आफ्नो दायित्व रहेको उहाँको भनाइ छ।
एनआरएनएको Member Information System (MIS), High Level Committee (HLC) पोर्टल तथा विभिन्न माध्यमबाट लिइएका सदस्यताहरू प्रमाणीकरण गरी Members Registration System (MRS) मा समायोजन गरिएको पनि जनाइएको छ। हाल अमेरिकामा रहेका सम्पूर्ण गैरआवासीय नेपालीहरूलाई जनवरी २६, २०२६ भित्र MRS मार्फत सदस्यता दर्ता गरी महाधिवेशनमा सहभागी हुन आग्रह गरिएको छ।
एनआरएनए एनसीसी अमेरिकाले आपसी एकता, सहकार्य र सहभागितामार्फत एकता महाधिवेशनलाई ऐतिहासिक र सफल बनाउन सबै गैरआवासीय नेपाली दाजुभाइ तथा दिदीबहिनीहरूलाई सदस्यता लिन हार्दिक अपिल गरेको छ।
