अमेरिकाको टेक्सासस्थित इर्भिङमा टेक्सास थारू सोसाइटीको आयोजनामा माघी सङ्क्रान्ति महोत्सव २०२६ उत्साह, उमङ्ग र सांस्कृतिक एकताको सन्देशसहित भव्य रूपमा सम्पन्न भएको छ। आइतबार, जनवरी १८, २०२६ मा भेटघाट रेस्टुरेन्ट, इर्भिङमा आयोजित कार्यक्रममा थारू समुदायसहित विभिन्न नेपाली समुदायका व्यक्तिहरूको उल्लेखनीय सहभागिता रहेको थियो।
कार्यक्रममा थारू समुदायको मौलिक पर्व माघीको सांस्कृतिक महत्वलाई झल्काउने परम्परागत खानपान, सांस्कृतिक झलक तथा विविध प्रस्तुतिहरू समावेश गरिएको थियो। विशेष आकर्षणका रूपमा राष्ट्रिय गायक मिलन लामाको विशेष सांगीतिक प्रस्तुति रहेको थियो, जसले कार्यक्रममा थप रौनक ल्याएको सहभागीहरूले बताएका छन्।
टेक्सास थारू सोसाइटीले समुदायबीच आपसी सद्भाव, एकता र सांस्कृतिक पहिचानलाई मजबुत बनाउने उद्देश्यले आयोजना गरेको उक्त कार्यक्रममा नयाँ पुस्तालाई आफ्नो भाषा, संस्कृति र परम्परासँग जोड्ने सन्देश प्रवाह गरिएको थियो।
आयोजक संस्थाले कार्यक्रम सफल बनाउन सहयोग पुर्याउने सम्पूर्ण पदाधिकारी, सदस्य, स्वयंसेवक, प्रायोजक तथा उपस्थित सबैप्रति हार्दिक धन्यवाद व्यक्त गर्दै भविष्यमा पनि यस्ता सांस्कृतिक कार्यक्रमलाई निरन्तरता दिने प्रतिबद्धता जनाएको छ।
