टेक्सास, अमेरिका — बारा समाज टेक्सासको आयोजनामा नेपाली महिलाहरूको महत्वपूर्ण सांस्कृतिक पर्व हरितालिका तीजको अवसरमा विशेष तीज कार्यक्रम फोर्टवर्थमा भव्य रूपमा सम्पन्न भएको छ।
अगस्ट २२ तारिख फोर्टवर्थस्थित Indian Kitchen Restaurant and Bar मा आयोजित कार्यक्रममा टेक्सासमा बसोबास गर्दै आएका बारा जिल्लाका नेपाली दाजुभाइ तथा दिदीबहिनीहरूको उल्लेखनीय सहभागिता रहेको थियो।
नेपाली मौलिक संस्कृति, परम्परा र सामाजिक एकतालाई प्रवासमा समेत जीवन्त राख्ने उद्देश्यले आयोजित कार्यक्रममा सहभागी महिलाहरूले तीजका गीतमा नाचगान गर्दै उत्साहपूर्वक पर्व मनाएका थिए। दर खाने कार्यक्रमसँगै तीज गीत, नृत्य तथा विभिन्न सांस्कृतिक प्रस्तुतिले कार्यक्रमलाई थप मनोरञ्जनात्मक बनाएको थियो।
कार्यक्रममा सहभागी दिदीबहिनीहरूले प्रवासमा रहेर पनि नेपाली भाषा, संस्कृति, परम्परा र चाडपर्वको संरक्षण गर्दै भावी पुस्तासम्म पुर्याउनुपर्नेमा जोड दिएका थिए। उनीहरूले यस्ता कार्यक्रमले प्रवासमा रहेका नेपाली समुदायलाई एउटै थलोमा जोड्नुका साथै जन्मभूमि र आफ्नो संस्कृतिप्रतिको सम्बन्धलाई थप प्रगाढ बनाउने बताए।
बारा समाज टेक्सासका अध्यक्ष अमरनाथ शाहले समाजको मूल भावना “Unity in Diversity, Culture, Heritage, Progress” अनुरूप कार्यक्रमले आपसी भाइचारा, सद्भाव र सामाजिक एकतालाई थप मजबुत बनाउन महत्वपूर्ण भूमिका खेलेको बताउनुभयो।
कार्यक्रम संयोजक भोला मैनालीले कार्यक्रम सफल बनाउन सहयोग गर्ने सम्पूर्ण सहभागी, सहयोगी तथा आयोजकप्रति धन्यवाद व्यक्त गर्दै कार्यक्रम भव्य, सभ्य र उल्लासपूर्ण रूपमा सम्पन्न भएको जानकारी दिनुभयो। उहाँले तीज नेपाली महिलाहरूको सांस्कृतिक पर्व मात्र नभई आपसी भेटघाट, आत्मीयता र सांस्कृतिक पहिचानलाई जोड्ने महत्वपूर्ण अवसरसमेत भएको बताउनुभयो।
कार्यक्रमको अध्यक्षता बारा समाज टेक्सासका अध्यक्ष अमरनाथ शाहले गर्नुभएको थियो। समाजका महासचिव रामप्रसाद अधिकारीले कार्यक्रम सञ्चालन गर्नुभएको थियो भने कार्यक्रम संयोजक भोला मैनालीले स्वागत मन्तव्य राख्नुभएको थियो।
कार्यक्रममा सहभागीहरूले हरितालिका तीजले नेपाली समाजमा सुख, शान्ति, समृद्धि, आपसी सद्भाव र एकता कायम राख्न प्रेरणा प्रदान गरोस् भन्ने शुभकामना व्यक्त गरेका थिए।
