९ बुँदे प्रतिवद्धता सहित ग्रेटर अस्टिन नेपाली सोसाईटीको महासचिवमा प्रदिप चौलागाईंको उमेद्वारी
ग्रेटर अस्टिन नेपाली सोसाईटीको महासचिव पदमा प्रदिप चौलागाईंले उमेद्वारी दिएका छन् । आगामी अप्रिल २१ तारिकका दिन टेक्ससको अस्टिनमा हुने निर्वाचनका लागि चौलागाईंले आफ्ना चुनाव लक्षित प्रतिवद्धता सहित उमेद्वारी सार्वजनिक गरेका हुन् ।
९ बुँदे चुनावी प्रतिवद्धता सहित यस पटकको निर्वाचनमा महासचिव पदका लागि दावेदारीमा रहेका चौलागाईंले सामाजिक संजाल मार्फत समेत सो प्रतिवद्धता सार्वजनिक गरेका छन् । सार्वजनिक प्रतिवद्धतामा नेपाली समुदायको बृहतर एकताको लक्ष्य सहित नेपाली मन्दिरको सुव्यवस्था, आर्थिक पारदर्शिता, कला, संस्कृति, खेलकुद, स्वास्थ्य लगायतका क्षेत्रमा थप जिम्मेवारी लगायतका पक्षलाई समेटिएको छ ।
चौलागाईंको उमेद्वारी पत्रमा उल्लेख भए अनुसार संस्थाको यस पटकको निर्वाचनमा निर्विरोध पदाधिकारी चयनको लक्ष्य रहेको भएपनि केही व्यक्तीका अडानहरुका कारण प्रतिस्पर्धात्मक रुपमा यस पटकको ग्रेटर अस्टिन नेपाली सोसाईटीको निर्वाचन हुँदैछ ।
सामाजिक कार्यका लागि पदिय लोभ भन्दा सेवा भाव जरुरी रहने बताउँदै आएका चौलागाईंले यस पटकको निर्वाचनमा आफ्नो उमेद्वारी संस्थागत पारदर्शिताका लागि समेत भएको आसय व्यक्त गरेका छन् । आफ्नो प्यानल सहित निर्वाचनको मैदानमा उत्रदै गरेका चौलागाईंले भनेका छन् । ‘निर्वाचनबाट भएपनि पदमा पुगेर केहि त संस्था र समाजको हितमा गरेर देखाउनु पर्छ भन्ने कुरालाई आत्मसाथ गरि हामीले उमेदवारी दिएका छौं ।’
आसन्न निर्वाचन लक्षित छलफल र प्रचार प्रसारलाई अघि वढाएका चौलागाईं र उनको प्यानले समाज सेवाको यस यात्रालाई पूर्णता प्रदान गर्न सबैको सल्लाह, सुझाव र साथको आवश्यक रहने उल्लेख गर्दै आफ्नो अमुल्य मत सहितको सहयोगका लागि नेपाली समुदायलाई अनुरोध पनि गरेको छ ।
यस्ता छन् महासचिव चौलागाईं र उनको प्यानको प्रतिवद्धता
१) संस्थालाई विधान बमोजिम संचालन गर्ने । विधानमा केहि परिमार्जन गर्नु पर्ने भएमा साधारण सभामा लगि सभाले निर्दिष्ट गरे बमोजिम विधान रहने र विधान बमोजिम संस्था चल्ने परिपाटीको बिकास गरिने छ ।
२ ) Website निर्माणः निर्माणाधीन वेबसाइट ६ महिना भित्र पूर्ण गरिने छ ।
३ ) आर्थिक पारदर्शिता को लागि रकम donation वा Fee लिए पछि तत्काल रसिद प्रदान गर्ने ब्यबस्था मिलाइने छ । प्रत्येक ३/३ महिनामा हिसाब किताब सार्वजनिक गरिने छ र वेबसाइटमा पनि राखिने छ ।
४) संस्थाले संचालन गरिरहेका नेपाली चाडपर्ब मनाउने, खेलकुँद प्रतियोगिता आयोजना गर्ने, स्वास्थ्य शिविर संचालन गर्ने, रक्तदान लगायतका कार्यक्रमहरुलाई निरन्तरता दिंदै थप कार्यक्रम संचालन गरिने छ ।
५) मन्दिरको वरिपरि धार्मिक गुरुहरु र प्राविधिकहरुको सल्लाह बमोजिम आबस्यक संरचना बनाउन छ महिना भित्र शुरु गरिने छ ।
६) Greater Austin Nepali Society community & Spritual Center (GANS – SC) लाई बढ्दो समुदायको आवस्यकता अनुरुपको सभा हल सहितको संरचना बनाउन छ महिना भित्र प्राविधकको सहयोगमा योजना तयार गरिने छ । त्यसपछि निर्माणको चरणमा प्रवेश गरिने छ ।
७ ) मन्दिर र सामुदायिक केन्द्रलाई बीचमा छेकेर एक तर्फ संचालन भएका कार्यक्रमले अर्को तर्फ असर नगर्ने बनाइने छ ।
८ ) पूरै प्रोपर्टिलाई प्राविधिकको सल्लाह बमोजिम तारबार वा अन्य तरिकाले सुरक्षित गर्ने ब्यबस्था मिलाईने छ ।
९ ) साधारण सभाले निर्दिष्ट गरे बमोजिम थप गतिविधि संचालन गरिने छ ||
