दुई दिने नेपाल भ्रमण पूरा गरेर कतारका अमिर (राजा) शेख तमिम बिन हमाद अल थानी स्वदेश फिर्ता भएका छन् । त्रिभुवन विमानास्थलमा नेपाली सेनाको एक टुकडीले २१ तोपको सलामी सहित सम्मान अर्पण गर्दै कतारका राजा थानीलाई स्वदेश फिर्ताका लागि विदा गरिएको हो ।
राजा थानीलाई विदाई गर्न राष्ट्रपति रामचन्द्र पौडेल, उपराष्ट्रपति राम सहायप्रसाद यादव, प्रधानमन्त्री पुष्पकमल दाहाल प्रचण्ड, सभामुख देवराज घिमिरे, उपप्रधान एवम् परराष्ट्रमन्त्री नारायणकाजी श्रेष्ठ र मन्त्रिपरिषद्का सदस्यलगायत उच्चपदस्थ अधिकारी, नेपालमा रहेका कुटनीतिक नियोगका प्रमुख तथा प्रतिनिधि विमानस्थल पुगेका थिए ।
राष्ट्रपति रामचन्द्र पौडेलको निमन्त्रणमा दुई दिने राजकीय भ्रमणका लागि हिजो नेपाल आएका थानीको हिजो नै राष्ट्रपति पौडेलसंग शीतल निवासमा भेटवार्ता भएको थियो । थानीको सम्मानमा राष्ट्रपतिले सोल्टी होटलमा रात्रिभोजको आयोजना समेत गरेका थिए भने आज बिहान प्रधानमन्त्री प्रचण्डसंग उनको भेटवार्ता भएको थियो ।
प्रधानमन्त्री पुष्पकमल दाहाल प्रचण्ड र कतारका राजा थानीबीचको भेटवार्तापछि प्रतिनिधिमण्डलले समझदारी पत्रमा हस्ताक्षर गरेका छन्। वार्ताका क्रममा दुवै देशबीच लगानी र सहकार्यका विषयमा सहमती भएको हो । भेटवार्तापछि दुवै देशका प्रतिनिधिमण्डलले विभिन्न आठ वटा क्षेत्रमा सहकार्य गर्न समझदारी पत्रमा हस्ताक्षर गरेका थिए ।
भेटमा देशबीचका सरकारी समाचार एजेन्सी, महान्यायाधिवक्ता कार्यालयसम्बन्धी, कुटनीतिक तालिम र अध्ययन, शिक्षा, कला र संस्कृति, खेलकुद क्षेत्रमा सहकार्य गर्ने समझदारी बनेको छ भने कतार चेम्बर अफ कमर्स र नेपाल उद्योग वाणिज्य महासङ्घबीच पनि दुई वटा सम्झौता भएका छन् ।
नेपाल र कतारबीच सन् १९७७ जनवरी २१ मा कुटनीतिक सम्बन्ध स्थापना भएपछि कतारका राजाको यो पहिलो नेपाल भ्रमण भएकाले पनि यस भ्रमणलाई दुवै देशले महत्वका साथ हेरेको थियो ।
