–राम प्रसाद अधिकारी ,
टेक्सास | टेक्सासको डालस अर्भिंग शहरमा आयोजना हुन लागेको मोमो फेस्टिभल २०२६ मा नेपालकी चर्चित गायिका समीक्षा अधिकारीले आफ्नो सांगीतिक प्रस्तुति दिने भएकी छन्।
आगामी शनिबार, सेप्टेम्बर २६, २०२६ मा आयोजना हुने महोत्सवमा समीक्षा अधिकारीले आफ्ना चर्चित गीतहरू ‘बालापनको उमेर’, ‘नबोली नबोली’, ‘दुश्मन हेरेको हेराइ’ लगायतका गीतहरू प्रस्तुत गर्नेछिन्। आयोजकले यसलाई अमेरिकामा उनको विशेष प्रस्तुति हुने जनाएको छ।
नेपाली कला, संस्कृति र खानाको प्रवर्द्धन गर्ने उद्देश्यले आयोजना गर्न लागिएको मोमो फेस्टिभलमा स्वादिष्ट मोमोसहित विभिन्न परिकार, लाइभ सांगीतिक कार्यक्रम, सांस्कृतिक प्रस्तुतिहरू तथा सबै उमेर समूहका लागि मनोरञ्जनात्मक गतिविधिहरू रहनेछन्।
विशेष गरी नेपाली समुदायसँगै दक्षिण एसियाली तथा स्थानीय अमेरिकी समुदायलाई समेत लक्षित गरिएको यस महोत्सवमा हजारौं दर्शकको सहभागिता रहने अपेक्षा गरिएको आयोजकको भनाइ छ।
आयोजकले १० वर्षमुनिका बालबालिकाका लागि प्रवेश निःशुल्क हुने जानकारी दिँदै टिकट अग्रिम रूपमा www.MoMoFestivals.com बाट खरिद गर्न अनुरोध गरेको छ।
मोमो, संगीत र नेपाली संस्कृतिको अनुपम संगम बन्ने अपेक्षा गरिएको मोमो फेस्टिभल २०२६ लाई अमेरिकास्थित नेपाली समुदायको एक ऐतिहासिक सांस्कृतिक उत्सवका रूपमा हेरिएको छ।
