अमेरिका भ्रमणमा रहनु भएका सुदुरपश्चिमका चर्चित युवा नेता पुष्पकुमार शाहीको मेरिल्याण्डको बालटिमोरमा स्वागत गरिएको छ । सुदूरपश्चिम नेपाली समाज मेरिल्याण्डले आईतबार बालटिमोरको फेमली किचेन रेष्टेरेन्टमा एक कार्यक्रमको आयोजना गरि शाहीको स्वागत तथा सम्मान कार्यक्रमको आयोजना गरेको हो ।
पुष्पकुमार शाही नेपाल बिद्यार्थी संघका पूर्ब केन्द्रीय उपाध्यक्ष तथा नेपाली काँग्रेस महा समिति सदस्य हुन । युवा नेता शाहीको स्वागत गर्दै सुदूरपश्चिम समाज मेरिल्याण्डका अध्यक्ष दमनबिक्रम शाहले सुदूरपश्चिमबाट आउने हरेक पाहुनालाई जानकारी भए सम्म समाजले स्वागत तथा सम्मान गर्दै आएको बताउनु भयो । नेपालमा समयको सही व्यवस्थापन गर्न नसक्दा नेपालको बिकासमा अबरोध भईरहेको बताउँदै अध्यक्ष शाहले नेतृत्व तहमा रहेका व्यक्तिहरुले समयको पालना गर्न सुझाव दिदै मेरिल्याण्डमा बसोवास गर्ने सुदूरपश्चिमेलीको तर्फबाट घडी उपहार प्रदान गर्नु भयो ।
कार्यक्रममा बोल्दै युवा नेता शाहीले अमेरिकामा बिभिन्न ठाउँमा रहेको भ्रमणबाट आफुले धेरै कुरा सिक्ने अवसर पाएको बताउँदै खासगरि अमेरिकामा रहनु भएका सुदूरपश्चिमेलीहरुबाट प्राप्त सल्लाह सुझावलाई सही सदुपयोग गर्ने प्रतिबद्धता व्यक्त गर्नु भयो ।
कार्यक्रममा नेपाल सरकारका अवैतनिक महावाणिज्यदूत तथा वरिष्ठ गायक प्रेमराजा महत, बानाका अध्यक्ष सुवोधविलास पन्त, एनआरएन मेरिल्याण्डका कार्यवाहक अध्यक्ष किरण पण्डित, पिडिआरसीका सिईयो तथा बाल्टिमोर मेयर अफिसका सल्लाहकार भिम बिके लगायत मेरिल्याण्ड नेपाली समाजका अगुवाहरुको उपस्थिति रहेको थियो
