चलचित्र ईश्वरको प्रिमियर पोखरामा हुने भएको छ । राजु गीरीको लेखन तथा निर्देशन रहेको ईश्वरको प्रिमियर शो आगामी बैसाख २९ गते पोखराको चिप्लेढुंगामा हुने भएको हो । चिप्लेढुंगा स्थित पोखराको ट्रेड मल सिनेप्लेक्समा बैसाख २९ गते विहान ११ बजे चलचित्रको प्रिमियर शो हुने भएको हो ।

आगामी मंसिर १४ गतेलाई प्रदर्शन मिति घोषणा गरेको चलचित्रमा पात्रहरुको मनोदशा प्रस्तुत गरिएको छ । पृथ्वीराज प्रसाईं रिसाहा मुद्रामा चित्रित छन् भने अभिनेत्री अनु शाह घाइते अवस्थामा प्रस्तुत छिन् ।

सिनेमाले अपराधको कथा बोल्ने पोस्टरले सार्वजनिक गरेको ईश्वर दिव्या कंगना फिल्मस्को ब्यानरमा निर्माण भएको हो जसमा निर्माता हरिबहादुर थापा र शंकर गिरी हुन् भने पटकथा तथा संवाद भोजराज देवकोटाको रहेको छ ।

लक्ष्मी कुँवर थापाको प्रस्तुतिमा निर्माण भएको सिनेमामा सुनिल थापा, सविन बास्तोला, माओत्से गुरुङ, शिशिर बाङ्देल, ध्रुव थापा, रविन्द्र झा, बुद्धि तामाङ, कृष्टि गुरुङ, गीता अधिकारी लगायतको पनि अभिनय छ । यो सिनेमाबाट अभिनेत्री अनु शाहले ५ वर्षपछि कमब्याक गरेकी छन् । पछिल्लो पटक उनी ‘पसिना’मा देखिएकी थिइन् ।

अर्जुन पोखरेल, राजेन्द्र बजगाई र बीपी वाग्लेको संगीत, कविराज गहतराज, देवेन्द्र पाण्डे र सुरेश पाण्डेको कोरियोग्राफी, रामेश्वर हुँमागाईको छायांकन र देव महर्जनको द्वन्द्व निर्देशन रहेको सिनेमालाई उपत्यकाभित्र रिच इन्टरटेनमेन्ट र उपत्यकाबाहिर एफडी कम्पनीले वितरण गर्नेछ ।

व्यव सिरिज नागिन

निर्देशक राजु गिरीको नेपाली व्यव सिरिज नागिनले आफ्नो आठौं एपिसोडले पनि सकारात्मक प्रतिकृया पाएको छ । गीरिको लेखन तथा निर्देशनमा निर्माण भएको सिरिज नागीन ईच्छाधारी नागिनको आठौं सिरिज ओएसआर डिजिटलको युटुव मार्फत शुक्रबार सार्वजनिक भएको हो ।

सविन बास्तोला, गीता अधिकारी, विनोद श्रेष्ठ, देव महर्जन, ओशिन भट्टराई चन्द्र लामा, अन्जु हमाल, संगीता शर्मा, सुस्मिता, देवराज आचार्य लगायत स्वयं निर्देशक गीरीको समेत अभिनय रहेको नागीन राजु गीरी प्रोडक्सनले निर्माण गरेको हो ।

रामेश्वर हुमागाईंको छायांकन र श्याम राजाको सम्पादन रहेको सिरिजको निर्माताका रुपमा शंकर गीरी, काजल गीरी, पूर्णकला गीरी कंगना गीरी र सरिता गीरी रहेका छन् ।