अमेरिकाको टेक्ससमा नेपाली समुदायका प्रतिनिधि तथा सदस्यहरुले नेपाली सञ्चार क्षेत्रका तिन जना सिनियर जर्नालिष्टसंग अन्तरक्रियात्मक भेटघाट गरेका छन् । टेक्सासको युलेशमा आज अर्थात अप्रिल २६ तारिक शुक्रबार आयोजित कार्यक्रममा टेक्सासको नेपाली समुदायले नेपाल पत्रकार महासंघ चितवनका अध्यक्ष तथा राष्टिय समाचार संस्था रा.स.स.चितवन जिल्ला प्रमुख नारायण अधिकारी, एपिवान टेलिभिजनका सिनियर जर्नालिस्ट मनोज जोशी र नेपाल आर्थिक पत्रकार समाज (सेजन)का पूर्व अध्यक्ष जनार्दन बरालसंग अन्तरक्रियात्मक भेटघाट गरेको हो ।
युलेशको द गुर्खा बार एण्ड ग्रीलमा स्थानिय समय अनुसार शुक्रबार साँझ ५स्३० बजेबाट सुरु भएको भेटघाट तथा छलफल कार्यक्रममा प्रमुख अतिथीका रुपमा सहभागी पत्रकारहरु अधिकारी, जोशी र बरालले आफ्ना सञ्चार अनुभव, प्रवासी नेपाली समाज र पत्रकारिता विचको सम्बन्ध र अवस्था, प्रवासी मिडिया र पत्रकारको भूमिका लगायताका महत्वपूर्ण विषयहरुमाथी आ आफ्ना महत्वपूर्ण बिचार व्यक्त गरेका थिए ।
त्यस्तै टेक्सासका संचारकर्मी, नेपाली समुदायका प्रतिनिधी तथा सदस्यहरुले टेक्सासको सामाजिक तथा सञ्चार अवस्था, नेपाली पत्रकारिता र प्रवासी पत्रकारिचता विचको चुनौती, नेपाली समुदायका साझा समस्या र पत्रकारले निर्वाह गर्नुपर्ने पारदर्शी कर्तव्य सम्बन्धित विषयमाथी जिज्ञासा र सुझाव दुवै राखेका थिए ।
