अर्जुन न्यौपाने : अप्रिल २८ टेक्सास,
नेपाली समाज टेक्सस (NST) ले विभिन्न रचनात्मक कार्यक्रम सहित वनभोज कार्यक्रम गरेको छ । टेक्ससको यूलेस नेपाली पशुपति बौद्ध मन्दिरबाट नजिकै रहेको ग्रेपभाइनको सुन्दर ताल सहितको पार्कमा आयोजना गरिएको कार्यक्रममा चारहजार बढी नेपालीहरुको उपस्थिति रहेको समाजका महासचिब विजयराज भुसालले रिपोर्टर्स क्लब अमेरिकालाइ जानकारी दिनुभयो । वनभोज कार्यक्रमका लागि आयोजकबाट नेपाली खाना तयार गरी उपस्थित नेपालीहरुलाई नेपाली खाना खुवाईएको थियो ।
कार्यक्रममा छविराज सुनार लगायत विभिन्न कलाकारले नृत्य तथा गायन प्रस्तुत गरेका थिए । नेप्लिज म्युजिकल एण्ड कल्चरल ग्रुप टेक्सासको उत्कृष्ट नेपाली पन्चेबाजाको प्रस्तुतिले आफ्नै मौलिकतामा झुमेको देख्न सकिन्थ्यो । बच्चाहरुका लागि वाउन्सी हाउसको व्यवस्थापनले अत्यन्तै खुशी वातावरण दिईरहेको थियो ।आयोजकबाट सन्चालन गरिएको बिगों चिठ्ठा कार्यक्रमले दर्शकहरु उत्साहित देखिन्थे । कार्यक्रमलाई व्यवस्थित पार्नका लागि स्वयंसेबाट पार्किगं र सुरक्षा व्यवस्था अत्यन्तै व्यवस्थित रहेको देख्न सकिन्थ्यो ।
नेपालीहरु जुन देशमा रहेता पनि आफ्नै मौलिक खाना र संस्कृतिमा मात्र मन खोलेर रमाउन सक्छन भन्ने कुराको सशक्त उदाहरण कार्यक्रममा देख्न पाईन्थ्यो । नेपालबाट घुम्नका लागि आउनु भएका बुवा आमाहरु नेपाली पनको कार्यक्रममा उपस्थित भएर सबैलाई देख्न पाँउदा नेपालकै झल्को आएको कुरा व्यक्त गरेको सुन्न पाईन्थ्यो । यसै सम्बन्धमा कारोबारका लागि लोन अफिसरमा कार्यरत स्थानीय खेम पनेरु भन्नु हुन्छ ,”नेपालीहरु आपसमा जुटेर यस किसिमका कार्यक्रम गर्नाले हामीमा नेपाली पनको आभास जाग्ने र नयाँ सन्ततिहरुलाई पनि नेपाली मौलिकता प्रति जागरूक बनाउने भएकाले चाडपर्व , धर्म , संस्कृति र भाषा सम्बन्धी कार्यक्रम हुनु अत्यान्तै महत्वपूर्ण छ। ”नेपालीहरुको एकताबद्द र मौलिकताप्रति NST ले प्रत्येक वर्ष यसरी नियमित नेपाली कार्यक्रम गर्दै आईरहेको छ ।
कार्यक्रममा नेपाली समाज टेक्सासका अध्यक्ष राजेन्द्र वाग्लेले उपस्थिति सम्पूर्णमा नयाँ बर्षको शुभकामना ब्यक्त गरेका थिए भने कार्यक्रमको उद्घोषण समाजका महासचिब बिजय भुसाल संगै नेपाली ग्लोबल पाठशालाका भाइस प्रिन्सिपल जेबिका अधिकारीले संयुत रुपमा गरेका थिए।
