नेपालका लागि अमेरिकी राजदुत डिन आर. थम्पसनले अमेरिका नेपालको आर्थिक भविष्यप्रति पुर्ण प्रतिवद्ध रहेको बताएका छन् । शनिवारबाट काठमाडौंमा सुरु भएको ईन्भेस्टमेन्ट ईन नेपाल लगानी सम्मेलनमा राजदुत थम्पसनले अमेरिका विगत ७७ बर्षदेखी नेपालको आर्थिक विकासमा गम्भिर रहेको स्मरण गर्दै भविश्यमा पनि सहकार्य निरन्तर रहने प्रतिवद्धता व्यक्त गरेका हुन् ।
यस विषयमा अमेरिकन दुतावासले सार्वजनिक गरेको जानकारीमा उल्लेख भए अनुसार थम्पसनले भनेका छन् ‘अमेरिकाले ७७ वर्षहरूमा नेपालको आर्थिक वृद्धिलाई प्रवर्द्धन गरेको छ र नेपालको आर्थिक भविष्यका लागि प्रतिबद्ध रहेको छ ‘ ।
सबै नेपालीका लागि आर्थिक अवसरहरू सिर्जना गर्ने साथै महिला र सीमान्तकृत समुदायहरू केन्द्रित थप परियोजनाहरू सहित सहयोगका लागि तयार रहेको बताएका थम्पसनले वित्तीय सेवा र व्यवसाय विकास सेवाहरूमा नेपालको निजी क्षेत्रको पहुँच र व्यापारिक वातावरणमा सुधार, बलियो र अधिक उत्पादनशील कृषि क्षेत्रलाई प्रवर्द्धन गर्दै नेपालको उच्च–प्रविधि क्षेत्रको विकास गर्न मद्दत गरिरहेको बताएका छन् ।
सम्मेलनमा राजदुत थम्पसनले नेपाल सरकार र निजी क्षेत्रसँग साझेदारी गर्ने अमेरिकी प्रतिबद्धतालाई जोड दिँदै वासिङ्टन, डिसी स्थित अमेरिकी सरकारका अधिकारीहरूको भिडियो सन्देश पनि प्रस्तुत प्रस्तुत गरेका थिए ।
सम्मेलनलाई लिएर दुतावासले नेपाल सन् २०२६ मा अति कम विकसित मुलुकबाट स्तरोन्नति हुने क्रममा रहँदै गर्दा यो सम्मेलन अत्यन्त महत्वपूर्ण रहेको बताउँदै नेपाल सरकारले आर्थिक वृद्धिका लागि सुधारहरू अवलम्बन गर्न र आफ्नो प्रभावशाली लोकतान्त्रिक प्रगतिलाई अझ अगाडि बढाउन निरन्तर चालेका कदमहरूको प्रशंसा पनि गरेको छ ।
अमेरिकी सरकार नेपालले व्यापारका लागि विश्वव्यापी गन्तव्यका रूपमा रहेको उल्लेख गर्दै दुतावासले अदभूत सम्भावनालाई हासिल गर्दै गर्दा र सबैका लागि थप समृद्ध भविष्य निर्माण गर्न कार्यमा अगाडी बढ्ने क्रममा नेपाललाई सहयोग गर्न तत्पर रहेको प्रतिवद्धता व्यक्त गरेको छ ।
अमेरिकी सरकारका अधिकारीहरू बाहेक,धेरै अमेरिकी फर्च्युन ५०० कम्पनीका प्रतिनिधिहरू नेपाललाई विदेशी लगानीको आशाजनक गन्तव्यका रूपमा थप जान्न सम्मेलनमा भाग लिन नेपाल आएका छन् ।
