रिपोर्टर्स क्लब अमेरिकाका सदस्य एबम Globlapostinfo का सस्थापक र सञ्चारकर्मि अर्जुन प्रधानकी हजुरआमा धनमाया प्याकुरेलको १ सय १ बर्षको उमेरमा निधन भएको छ । भुटानको चिराङ् जिल्ला अन्तर्गत राते खोला गाउँमा सन् १९२३ जनवरी १ मा जन्मनुभएकी प्याकुरेलको गत अप्रिल ७ मा अमेरिकाको पेन्सिलभेनियामा निधन भएको पारिवारिक श्रोतले जनाएको छ ।
बाल्यकाल देखि नै मिलनसार र मृदुभाषी छवी भएकी प्याकुरेलले चिराङ् जिल्ला अन्तर्गत छोकाना चनौटे निवाशी पण्डित काशिनाथ प्याकुरेलसंग दाम्पत्य जीवनमा बाँधिनुभई छ जना सन्तानलाई जन्म दिनु भएको थियो । दिवंगत धनमाया पण्डित उपेन्द्र प्याकुरेलकी जेठी माता हुनुहुन्थ्यो ।
देश निस्कासनको कुचक्रमा परेर सन् १९९० को दशकमा शरणार्थी बनी बेलडागी १ मा दुई दशक शरणार्थी जीवन बिताउनु भएकी उहाँले जगद्गुरु योगिराज स्वामीजीसंग श्री सम्प्रदायमा पञ्चसंस्कार दीक्षा ग्रहण गरेर गुरु वाक्यमा विश्वास एवं श्रद्धा र भक्तिका साथ आजीवन रहनुभयो ।
पुनर्वासको क्रममा संयुक्तराज्य अमेरिकाको पेन्सिलभेनिया राज्य अन्तर्गत मेकानिसवर्क शहरमा स्वर्गिय चापागाई परिवारका साथमा बसोबास गर्दै आउनु भएको थियो । गत अप्रिल ७ बिहिबार बिहान ९ः३० बजेको समयमा उहाँले आफन्त, छोराछोरी, दाजुभाई, दिदीबहिनी, सम्पत्ति, इष्टमित्र र शरीरलाई छाडेर संसारबाट बिदा हुनुभयो ।
मातृशोक रूपी ज्वालामा पर्नु भएका प्रिय परिवारप्रति रिपोर्टर्स क्लब अमेरिका परिवार हार्दिक समवेदना व्यक्त गर्दछौँ एवम् दिवंगत आत्मालाई वैकुण्ठारोहणको निमित्त ईष्टदेवसँग प्रार्थना गर्दै भावपूर्ण श्रद्धाञ्जली अर्पण गर्दर्छौ ।
