गैर आवासीय नेपाली सङ्घ क्यालिफोर्निया च्याप्टरको आयोजनामा भएको भलिबल टुर्नामेन्टमा टेक्सास डालसको भलिबल क्लब नेपस्टार अफ डिएफ़डब्लुले उपाधि जित्न सफल भएको छ। १५ टीम सम्मिलित उक्त टुर्नामेन्टमा टेक्सासबाट मात्र ४ वटा टीमहरु सहभागी भएका थिए । निकै प्रतिस्पर्धात्मक र रोमाञ्चक रहेको फाइनल खेल भने दोस्रो पुस्ताको बाहुल्यता रहेको न्यु योर्कको भलिबल टीमसंग भएको थियो।
नेपालीहरूद्वारा आयोजित भलिबलमा १२ हजार डलर पुरस्कारको राशी अहिलेसम्मको सर्वाधिक राशि हो।। त्यससंगै नेपस्टार अफ डिएफडब्लुले पदक तथा प्रमाणपत्र पनि प्राप्त गरेको छ। खेलमा १० जना खेलाडीहरु थिए जसको नेतृत्व नेपाली राष्ट्रिय टोलिका सफल खेलाडी कैलाश भट्टले गरेका थिए। टीममा दिपक थापा, मनोज गौतम, नविन खड्का, खुम ढकाल, संयोग दुलाल, आयुष मल्ल, गणेश मल्ल, सुजन परियार र सुदिप बस्न्यात थिए।यस अघि नेप्स्टार टीमले क्वाटर फाइनलमा अस्टिन टेक्ससको बाँफिकोट रुकुमसंग खेलेर जितेको थियो भने सेमिफाइनलमा रुकुम टीमसंग प्रतिष्पर्धा गरेको थियो।
एनआरएनए क्यालिफोर्निया च्याप्टरद्वारा सम्पन्न गरिएको यस भलिबल प्रतियोगिता पश्चात विभिन्न सहभागी टिमहरूले आयोजकलाई धन्यवाद दिँदै, व्यवस्थापनको निकै प्रशंसा गरेका थिए। साथै भविष्यमा पनि गैर आवश्य नेपाली संघले यस्तो कार्यक्रम गर्दै समुदाय र युवा पिढीलाई जोड्दै लैजान सक्नुपर्ने बताएका थिए।
