नेपाली सांगीतिक क्षेत्रका ख्यातिप्राप्त गायक प्रकाश सपुतले अमेरिकाको टेक्ससमा आफ्नो प्रस्तुती दिने भएका छन् । गायक सपुतले आगामी जुन १४ तारिकका दिन नेपाली बाहुल्य राज्य टेक्ससको युलेश सहरमा आयोजना हुँदै गरेको हिमालयन कल्चर नाईट नामक साँस्कृतिक कार्यक्रममा अन्य चर्चित कलाकारका साथ आफ्नो प्रस्तुती दिने भएका हुन् ।
अमेरिकामा स्थापित सामाजिक संस्था डेभलपमेन्ट फर पिस इन्टरनेसन तथा अमेरिकामा स्थापित नेपाली व्यवसायी संस्था सि.आर.सोलुसन्स आयोजक रहेको यस कार्यक्रम सामाजिक कल्याण हेतु आयोजना हुन लागेको हो । जहाँ गायक सपुत संगै गायिका मुना थापा मगर, छवि राज सुनार लगायत स्थानिय कलाकारहरुको साँगीतिक तथा साँस्कृतिक प्रस्तुती रहने छ ।
जुन १४ तारिकका दिन साँझ ६ बजेबाट सुरु हुने यस कार्यक्रमा सहभागी हुन ईच्छुकहरुका लागि टिकेट समेत खुल्ला गरि सकिएको छ । जसमा उल्लेख भए अनुसार एकल सहभागी दर्शकका लागि ३० डलर र युगल सहभागिताका लागि ५० डलर प्रवेश शुल्क तोकिएको छ ।
कार्यक्रममा संकलित रकम सामाजिक कार्य संवद्ध क्षेत्रमा खर्च गर्ने लक्ष्य राखेका आयोजक सस्था डेभलपमेन्ट फर पिस ईन्टरनेशनलका प्रेसिडेन्ट दिपक खरेलले जानकारी दिनु भएको छ। डेभलपमेन्ट फर पिस ईन्टरनेशनल एक सामाजिक संस्था हो । टेक्ससको यूलेसमा मुख्य कार्यलय रहेको यस संस्थाले विगत १५ बर्ष देखि नेपालका अनाथ, असहाय बालबालिका तथा ग्रामिण भेगका विपन्न महिलाहरुको हितमा काम गर्दै आएको छ । संस्थाले विपन्न समुदायका बालबालिकाको शैक्षिक स्तरोन्नति तथा महिलाहरुको आर्थिक परिवर्तनका सवालमा महत्वपूर्ण योगदान पुर्याउँदै आएको छ । जसले अमेरिकामा स्थापित अन्य संघ संस्थाहरुसंगको सहकार्यका रक्तदान, घरबारविहिनहरुका लागि सहयोग लगायतका सामाजिक कार्यहरु समेत गर्दै आएको छ ।
डेभलपमेन्ट फर पिस इन्टरनेसनलका अध्यक्ष दीपक खरेलका अनुसार हिमालयन कल्चरल नाईट नेपाली समुदाय बाहुल्य क्षेत्र डालस–फोर्टवर्थका नेपालीहरु लक्षित यस कार्यक्रम नेपाली कला, संस्कृतिका माध्यमबाट सामाजिक उत्तरदाहित्व निर्वाहको उदेश्य सहित आयोजना हुन लागेको हो । अध्यक्ष खरेलले कार्यक्रममा सहभागि भएर मनोरञ्जन सहित समाज सेवाको पुनित यात्रामा सहकार्यमूलक सहभागिताका लागि नेपालीहरुलाई अनुरोध पनि गरेको छन् ।
त्यस्तै अमेरिकामा सफल व्यवसायिक छवि निर्माण गरेको कम्पनी सि.आर. सोलुसन्सका अध्यक्ष दिलीप ज्ञवालीले आपसी भाईचारा र संस्कृति हस्तान्तरणका दृष्टिले समेत महत्वपूर्ण ठानिएको यस कार्यक्रम मानव कल्याण हेतु आयोजना हुँदै गरेकाले पनि आफु र आफ्नो कम्पनी सहकार्य गरेको बताएका छन् । साथै उनले सोहि दिन कार्यक्रम स्थलमा नै डालस, अस्टिन, ह्युस्टन लगायतका शहरका फ्युल तथा कन्भेनिएन्स स्टोरहरुको ‘ट्रेड शो’ समेत हुने जानकारी दिंदै नेपालीहरुको स्वामित्व तथा संचालनमा रहेका फ्युल तथा कन्भेनिएन्स स्टोरहरुलाई उक्त ‘ट्रेड शो’ मा सहभागि हुनका लागि समेत अनुरोध गरेका छन् ।
