टेक्सास, अमेरिका
अमेरिकाको टेक्सासमा रहेका थारु समुदायले यस बर्षको माघी पर्ब आईतबार धुमधामका साथ मनाएका छन । टेक्सास थारु समाजको आयोजनामा माघी पर्ब बिभिन्न कार्यक्रमको आयोजना गरि मनाईएको समाजका सचिब रामकुमार चौधरीले बताउनु भयो ।सचिब चौधरीका अनुसार टेक्सासको अर्भिङमा आयोजना गरिएको माघी पर्ब कार्यक्रममा थारु पोशाक, थारु परिकारको प्रदर्शनी गरिएको थियो ।माघी पर्बको अवसरमा सेल रोटी, माछाको परिकार, तरुल, लड्डु, ढिक्री रोटी लगायतका परिकारका साथै सहभागिहरुलाई भोजन गराईएको थियो । कार्यक्रममा थारु महिलाहरु थारु पोशाकमा सजिएर आएका थिए ।अमेरिकाको व्यस्त जीवनशैलीका कारण माघी पर्बमा सामुहिक भेटघाट गर्ने, सुख दुःख साटासाट गर्ने, रमाईलो गर्ने गरिएको कार्यक्रमका सहभागि थारु अगुवा गीता चौधरीले बताईन ।कार्यक्रममा थारु अगुवाहरु रामकुमार चौधरी, गिता चौधरी, मनिषा चौधरी लगायतका बक्ताहरुले एकताबद्ध भएर प्रवासमा थारु पहिचान, सँस्कृतिको सँरक्षण गर्नु पर्ने र थारु सँस्कृतिलाई क्रमस पुस्तान्तरण गर्दै लैजानु पर्ने कुरामा जोड दिनु भएको थियो । केही समय यता अमेरिकाको टेक्सासमा थारु समुदायको बसोबास बढ्दो क्रममा रहेको छ ।थारू समुदायले माघ १ गते अर्थात माघी सँक्रान्तीलाई नयाँ वर्षका रूपमा स्नान, दान, एवं खानपिन र रमाइलो गरेर माघीपर्व धुमधामका साथ मनाउने गर्दछन ।थारु अगुवाहरुका अनुसार सूर्य उत्तरायण प्रवेश गर्ने दिन माघ १ गते थारू समुदायको नयाँ वर्ष अर्थात् माघीपर्व पर्दछ ।माघ १ गतेदेखि पाँच दिनसम्म धुमधामका साथ नेपालको तराई क्षेत्रमा यो पर्व मनाइन्छ । माघ १ गते बिहानै जलाशयमा गई स्नान, पूजा गरी ठूलाबडाकहाँ गएर आशीर्वाद लिने परम्परा थारू समुदायको छ ।माघी सँक्रान्तीको बेलुका घरमा ठूलाठूला मुढा बालेर धुनी जगाउँनुका साथै चारैतिर घरपरिवार र पाहुना बसेर खानपिन गर्ने गर्दछन । माघी पर्बको अवसरमा सक्नेहरू चारधाम जाने र नसक्नेहरूले नजिकको तीर्थमा गई गच्छेअनुसार दीनदुःखीलाई दान गर्ने चलन थारु समुदायमा रहेको छ ।तिलले स्नान गर्नु, तिलको तेल घस्नु, पितृलाई तिलयुक्त जल दिनु, तिल हवन गर्नु, तिल दान गर्नु र तिल खानु गरी जम्मा छ प्रकारले तिलको प्रयोग यस दिन जसले गर्छ त्यो असफल हुँदैन भन्ने जनबिश्वास समेत रहेको पाईन्छ ।विशेषगरी तराईका थारूले चामल र मासको दालबाट बनाइएको खिचडी खाने हुनाले यस चाडलाई खिचडी भन्ने चलन पनि छ । थारू समुदायका मानिसले माघीका दिन खानका लागि पुसकै दिन अनदी चामलको जाँड बनाएर राख्ने गर्छन् । विवाह, यात्रा, बसाइँसराइका लागि माघीका समयमा साइत हेर्न नपर्ने चलन पनि थारू समुदायमा रहेको छ ।
