टेक्सास, अमेरिका — गैर आवासीय नेपाली संघ (NRNA) NCC USA को आगामी २०२५–२०२७ कार्यकालका लागि हुने निर्वाचनमा दिपेन्द्र गुरागाईंले उपाध्यक्ष पदमा उम्मेदवारी घोषणा गरेका छन्।
सामुदायिक सेवा र सामाजिक उत्तरदायित्वमा विगतदेखि सक्रिय गुरागाईं हाल NRNA टेक्सास च्याप्टरका अध्यक्ष (२०२३–२५) को रूपमा कार्यरत छन्। उनले टेक्सासमा रहेको विभिन्न नेपाली संघ–संस्थामा उल्लेखनीय भूमिका निर्वाह गर्दै आएका छन्।
गुरागाईं टेक्सोमा नेपाली समाजका संस्थापक सदस्य तथा अध्यक्ष भइसकेका छन् भने नेपाली समाज टेक्सासको कार्यसमितिमा रही सामाजिक योगदान दिइसकेका छन्। यस्तै, एभेरेस्ट अर्भिंग सेण्टेनिएल लाइन्स क्लब लगायत सामाजिक क्षेत्रका अन्य संस्थामा पनि उनको सक्रिय सहभागिता रहेको छ। नेपालमा रहँदा समेत उनी विभिन्न सामाजिक क्लबहरूसँग आवद्ध थिए।
उम्मेदवारी घोषणा गर्दै उनले भने,
“पहिलोपटक टेक्सास च्याप्टरको अध्यक्ष पदमा निर्वाचित हुँदा जुन साथ र विश्वास पाएको थिएँ,
त्यो नै मेरो प्रेरणाको स्रोत हो। अब उपाध्यक्ष पदमा निर्वाचित भई अझ फराकिलो रूपमा
समुदायको सेवा गर्ने चाहना छ।”
गुरागाईं प्यानलको राजनीति भन्दा “च्यानलको माध्यमबाट एकता र सहकार्य” मा विश्वास गर्ने बताउँछन्।
उनले भने —
“म प्यानल होइन च्यानलमा विश्वास गर्छु। २ वर्षको कार्यकालमा मैले एउटा राम्रो च्यानल बनाएको छु, जसले NRNA लाई नजिकबाट बुझ्ने अवसर दिएको छ। सामाजिक संस्था भनेको सबैलाई जोड्ने थलो हो, प्यानलले समाजमा मतभेद उत्पन्न गराउँछ। हामी सबै एकल प्रतिस्पर्धाबाट सेवा गर्नुपर्ने हो।”
उनको उम्मेदवारीले NRNA NCC USA मा अनुभव, समर्पण र स्पष्ट दृष्टिकोणलाई समेटेको अनुभूति गराएको छ।
अहिले संघलाई सक्षम, समावेशी र प्रभावकारी बनाउने नेतृत्वको आवश्यकता रहेको सन्दर्भमा गुरागाईंको उम्मेदवारीलाई गम्भीर रूपमा हेरिएको छ।
