काठमाडौं । चलचित्र पत्रकार संघ नेपालले आफ्नो संगठनात्मक सञ्जाललाई अन्तर्राष्ट्रिय स्तरमा विस्तार गर्ने उद्देश्यका साथ विदेश च्याप्टर गठन प्रक्रियालाई औपचारिक रूपमा अगाडि बढाएको छ। संघको हालै सम्पन्न कार्यसमिति बैठकले विभिन्न देशमा च्याप्टर गठनका लागि संयोजकहरू चयन गर्दै जिम्मेवारी प्रदान गरेको हो।
निर्णयअनुसार अमेरिकामा दाङ शाखाका संस्थापक अध्यक्ष किशन रेग्मी, क्यानडामा संघका पूर्वउपाध्यक्ष श्याम अर्याल, जापानमा पूर्वसचिव उत्तम गौडेल, युरोप क्षेत्रमा मकवानपुर शाखाका पूर्वअध्यक्ष मणिराज गौतम, अष्ट्रेलियामा संघका सदस्य दीपेन्द्र घिमिरे, बेलायतमा सदस्य दिप्सन लुईटेल तथा कतारमा चलचित्र पत्रकार कमल साउद लाई संयोजकको जिम्मेवारी प्रदान गरिएको छ।
संघका अध्यक्ष समीर बलामीका अनुसार विदेश च्याप्टरहरू केवल संस्थागत प्रतिनिधित्वमा सीमित रहने छैनन्। यी च्याप्टरहरूले नेपाली चलचित्रको अन्तर्राष्ट्रिय प्रवर्द्धन, विश्वव्यापी बजार विस्तार, विभिन्न देशका चलचित्रकर्मी तथा संस्थासँग सहकार्य अभिवृद्धि गर्न र सांस्कृतिक कूटनीतिको प्रभावकारी माध्यमका रूपमा समेत भूमिका निर्वाह गर्नेछन्।
संघले विश्वभर रहेका नेपाली चलचित्र पत्रकार, सञ्चारकर्मी तथा चलचित्रप्रेमीहरूलाई एउटै सञ्जालमा आबद्ध गर्दै नेपाली चलचित्र उद्योगलाई अन्तर्राष्ट्रिय स्तरमा थप सशक्त र प्रभावकारी रूपमा स्थापित गर्ने लक्ष्य लिएको जनाएको छ।
यसअघि नै दुबईमा वरिष्ठ चलचित्र पत्रकार कमल श्रेष्ठ को अध्यक्षतामा ९ सदस्यीय चलचित्र पत्रकार संघ नेपाल च्याप्टर गठन भइसकेको छ। नयाँ देशहरूमा च्याप्टर विस्तारसँगै संघको अन्तर्राष्ट्रिय उपस्थितिलाई अझ सुदृढ बनाउने विश्वास गरिएको छ।
