विगत ४ महिनादेखि अमेरिकाको न्यूयोर्क स्थित अस्पतालहरुमा जीवन र मृत्युसंग लडिरहेका दाङका श्रवण कुमार सुवेदीको निधन भएको छ । न्युयोर्क आएको केही समयपछि नै घाँटी र टाउकोको क्यान्सर अन्तिम चरणमा लामो समयको उपचार र अस्पताल भर्ना भएका सुवेदीको अन्तत न्यूयोर्कको क्वीन्स स्थित जमैका अस्पतालमा निधन भएको हो ।
२ बर्ष पहिले अवैधानिक रुपमा तल्लो बाटो हुँदै अमेरिका प्रवेश गरेका तुल्सिपुर उपमहानगरपालिका १६ उत्तर कुरहरिया, दाङका ३९ बर्षिय सुवेदीलाई बचाउन नसक्ने अस्पतालले घोषणा गरेपछि राप्ती सेवा समाज न्यूयोर्कले उनको परिवारको सहयोगार्थ गो फण्ड संचालन गरि रकम संकलन सुरु गरेको थियो । सो रकम समाजले स्व. सुवेदीका दाजुलाई हस्तान्तरण गरेको छ । १ सय ४८ जना सहयोगदातावाट संकलित ९ हजार ५ सय ९ डलर रकम पिडित परिवारलाई हस्तान्तरण गरेको राप्ती सेवा समाज न्यूयोर्कले सुवेदीको निधनप्रति गहिरो समवेदना प्रकट गर्दै शोक व्यक्त गरेको छ ।
राप्ती समाज न्युयोर्कका अध्यक्ष केशव बस्नेतका अनुसार दुई बर्ष पहिले अमेरिकाको न्यूयोर्क आएका सुवेदीले विगत ४ महिनादेखि अस्पतालको शैयामा कष्टकर अवस्थाको सामाना गर्दै आएका थिए । उनलाई न्युयोर्क आएको केही समयपछि नै घाँटी र टाउकोको क्यान्सर देखिएको थियो । अन्तिम चरणमा रहेको क्यान्सरका कारण उनले अमेरिका आएर पनि काम गर्न नसक्दा सुरुवाती समयबाट नै समस्या झेल्दै आएको परिवारमा उनको निधनले थप समस्या बढेको छ । महंगो व्याजमा ठुलो रकम ऋण लिएर अमेरिका आएका उनलाई लामो समय एल्महर्स्ट अस्पतालमा राखिएको थियो तर अवस्था चिन्ताजनक बन्दै गएपछि हाल उनलाई क्वीन्सको जमैका अस्पतालको आईसियुमा कृतिम स्वास दिएर राखिएको थियो ।
अमेरिका आएको २ बर्ष भएपनि नयाँ ठाउँ र स्वास्थ अवस्था कमजोर भएकै कारण उनले कमाएर ऋण तिर्ने अवस्था रहेन । आफुसंग भएको सबै सम्पत्ती सहित अत्यन्त ठुलो रकम ऋण खोजेर विभिन्न राष्ट हुँदै अमेरिका आएका सुवेदीले लिएको महंगो व्याज सहितको ऋण तिर्न सक्ने अवस्था परिवारमा छैन ।अल्पआयुमा नै संसारबाट विदा भएका सुवेदीको निधनले सन्तान र परिवारको भविश्य समेत अन्यौलमा परेको छ ।
