न्यूयोर्कको अस्पतालमा निधन भएका लक्ष्मण बहादुर मल्लको अन्तिम संस्कार सम्पन्न भएको छ । नेपालको पर्वत जिल्ला मोदी गाउँपालिका–६,गिजानका स्व. मल्लको पेन्सेलभेनिया राज्यको ल्यानकास्टरमा हिन्दु परम्परा अनुसार अन्तिम संस्कार गरिएको हो ।
गत मे १ तारिकका दिन न्यूयोर्कको अस्पतालमा निधन भएका ४३ बर्षिय मल्लको शव न्यूयोर्कबाट पेनसेलभेनिया ल्याएर परिवारको उपस्थितीमा दाह संस्कार गरिएको हो । पेन्सेलभेनिया ल्यानकास्टर स्थित दाहगृह चार्ल्स एफ सिनडर फ्युनेरल होम्समा दाह संस्कार गरिएका मल्लको परिवार नेपालबाट आउन नसक्ने भएपछि आफन्तको उपस्थितीमा उनको अन्तिम संस्कार सम्पन्न भएको हो ।
गत अप्रिल २८ मा एक्कासी चक्कर लागेर भुइँमा ढलेपछि न्यूयोर्क राज्य स्थित साउथसाइड अस्पतालको आकस्मिक कक्षबाट भेन्टिलेटरमा राखेर उपचार सुरु गरिएका उनको अस्पतालले भौतिक र प्राविधिक रूपमा ब्रेन डेड भै सकेको जानकारी दिएको थियो । अस्पताले उनलाई मे १ तारिकका दिन मृत घोषित गरेको थियो ।
स्व. मल्लको पार्थिव शरिरलाई उनका काका संजय मल्लले दागवत्ती दिएका थिए भने आफन्तहरुमा भाई राजन मल्ल ,सालाहरुमा दिलिप कुमार लामिछाने ,अनिश कुमार लामिछाने ,अर्जुन लामिछाने ,पवन लामिछाने र सन्दिप लामिछानेको लगायतको उपस्थिती रहेको थियो ।
महंगो व्याज सहितको भारी ऋण काडेर सन् २०२३ मा मेक्सिको हुँदै अवैधानिक रुपमा अमेरिका आएका मल्लको निधनले परिवार थप समस्यामा परेको छ । कमाउन गएको सदस्यको अकल्पनिय निधन भएपद्धि श्रीमती सहित ४ जनाको परिवारको भविश्य समेत अन्यौलमा परेको छ । स्व. मल्लको परिवारमा श्रीमती सजिता लामिछाने, २० बर्षियाछोरी सभ्यता मल्ल, १७ बर्षिया छोरी दिव्यता मल्ल र १२ बर्षिय छोरा दीप्सन मल्ल रहेका छन् ।
पर्वत समाज अमेरिकाका अध्यक्ष रबिन शर्मा समेतको उपस्थितिमा गरिएको मल्लको पार्थिव शरिरको अन्तिम संस्कारमा नेपाली तथा भुटानी समुदायका सदस्यहरुको उपस्थिति रहेको थियो ।
अल्पायुमा नै निधन भएका मल्लको परिवारको सहयोगार्थ पर्बत वेलफेयर सोसाइटी न्यूयोर्कका प्रकाश शर्माले गोफन्ड संचालन गरेका छन् । स्व. मल्लको परिवार र सन्तानको सहयोगार्थ संचालित गो फण्डमा रकम संकलन गरि सहयोग गरिदिन शर्माले नेपाली समुदायसंग अनुरोध पनि गरेका छन् ।
स्व. मल्लको परिवारलाई सहयोग गर्न तलको लिंकमा क्लिक गनुहोस् ।
https://www.gofundme.com/f/stand-with-laxmans-family-in-their-grief?utm
