नेपाली राष्ट्रिय क्रिकेट टोलीका सदस्य ख्यातिप्राप्त क्रिकेटर दीपेन्द्रसिंह ऐरी टी–२० क्रिकेट विश्व वरीयताको अलराउन्डरतर्फ शीर्ष १० मा पर्न सफल भएका छन् । अन्तर्राष्ट्रिय क्रिकेट काउन्सिल (आईसीसी) ले आज सार्वजनिक गरेको वरीयतामा दीपेन्द्र टी–२० विश्व वरीयताको शिर्ष १० मा सुचिकृत हुन सफल देखिएका हुन् ।
टी–२० वरीयताको ब्याटिङतर्फ ५० औँ स्थानमा यथावत् छन् । यसअघि टी–२० वरीयताको अलराउन्डरतर्फ ११ औँ स्थानमा रहेका दीपेन्द्र एक स्थान सुधार गर्दै १० औँ स्थानमा आइपुगेका हुन् । उनि टी–२० अलराउन्डरको वरीयतामा एसोसिएट राष्ट्रतर्फ पहिलो नम्बरमा रहेका छन् ।
यस्तै टी–२० वरीयताको अलराउन्डरतर्फ कुशल मल्ल ३३ औँ र गुल्सन झा ६१ औँ स्थानमा छन् भने कप्तान रोहितकुमार पौडेल ६६ औँ स्थानमा , करण केसी ७४ औँ स्थानमा, आसिफ शेख ८७ औँ स्थानमा रहेका छन् ।
टी–२० वरीयताको बलिङतर्फ ९२ औँ स्थानमा सोमपाल कामी यथावत् रहेका छन् । यो संगै टी–२० वरीयतामा नेपाल एक स्थान तल झर्दै १७ औँ स्थानमा देखिएको छ ।
