अर्जुन न्यौपाने टेक्सस मे २१
नेपाली जनमानसमा आफ्नो देशबाट यूरोप अष्ट्रेलिया र अमेरिका जस्ता देशहरुमा गई घरजम गरेर बस्ने नेपालीहरुले धर्म कर्म रिती रिवाज जस्ता कुराहरुमा त्यति महत्व दिंदैनन् भन्ने जनगुनासो बेला बेलामा सुन्न पाईन्छ । विदेशी भूमिमा जीवन व्यतित गर्ने केहि नेपालीहरुले आफ्नो धर्म संस्कृतिलाई वेवास्ता गर्ने र चाडपर्वलाई महत्व नदिने भएका कारण यस्ता गुनासा सुन्ने गरिन्छ । तर यस्ता गुनासाका बाबजुत केहि नेपाली परिवारहरु छन् जसले आफ्नो धर्म संस्कृति र चाडपर्वलाई नेपालमै जस्तै महत्व दिएर आफ्नो अस्तित्वलाई संरक्षण गर्दै भावी पुस्तामा हस्तान्तरण गर्नुपर्छ भन्ने अभियानमा लागि रहेका छन् । यस्तै मध्येका एक हिन्दू धर्मका अभियान्ता हुनुहुन्छ डोलराज पाण्डे, जसले समय सन्दर्व र पर्व अनुसार धार्मिक कार्यक्रमका अभियानहरु नेपाल र अमेरिकामा गर्दै आउनु भएको छ ।’आध्यात्मिक भक्तिभावले नै आत्मसन्तुष्टी दिन सक्छ ‘ भन्ने विस्वास र हजुरबुवा रामकृष्ण पाण्डेको धार्मिक उत्प्रेरणाबाट आँफू यस क्षेत्रमा लागेको पाण्डे बताउनुहुन्छ ।दुई छोरा र एक छोरी रहेका पाण्डेले सानैदेखि गीत संगीतमा रूचि राख्दै केहि साँगितिक एल्बम समेत निकाल्नु भएको छ । पढाईमा सधै अब्बल र किताबका विषवस्तुलाई दुरुस्त मानसपटलमा सुरक्षित गर्ने पाण्डेले मेडिकल स्वास्थ्य विषयको अध्ययन गरी नेपालमा १५ वर्ष भन्दा वढी सरकारी स्वास्थ्य विभागमा अहेवबाट प्रमोशन भई एच ए मा रहेर सेवा गर्नुभएको थियो ।
दुई दशक भन्दा बढी अमेरिकामा रहेर विभिन्न व्यवसाय संचालन गर्दै आउनु भएका पाण्डेले नेपाल र अमेरिकामै प्रशस्तै यज्ञ पूजा पाठका कार्यक्रमहरु सम्पन्न गरिसक्नु भएको छ । आफ्नो जन्मभूमि कालिगण्डकी गाँउ पालिका १ हर्मिचौर गुल्मीमा २०७० सालमा विशाल महायज्ञ गरी स्यागंजा पर्वत र गुल्मीको संगमस्थल सेतिवेणीमा अवस्थित श्री शीला शालिग्रामलाई हेलिकप्टरद्वारा पंचामृत स्नान गराउनु भएको थियो । २०६७ तथा २०७२ सालमा कालिगण्डकी जलविधुत परियोजनाको ड्याम रेप्का साईडमा वृन्दावन एवम् विष्णुधाममा राधा कृष्ण मन्दिरको स्थापना समेत पाण्डेले गर्नुभएको थियो । गुल्मीको प्रसिद्ध तीर्थस्थल हिले मन्दिरको व्यवस्थापनका लागि पनि आवश्यक सहयोग पाण्डेले गरेको जानकारी गराउनु भयो ।
हाल अमेरिकाको टेक्सस राज्यको डालस फोर्थ वर्थ ह्यसलेटमा एप्रिल २५ देखि जुन २८ सम्म ७२ दिनको शुक्र अस्त भरि भागवत् गीता प्रवचन कार्यक्रम पाण्डेले चलाईरहनु भएको छ । कार्यक्रममा गुरु चन्द्रकान्त शास्त्रीले प्रवचन तथा बीमला वलीले भक्तजनहरुलाई भजन संगित दिईरहनु भएको पाण्डे श्रीमती छाँया कुमारी पाण्डेले जानकारी दिनुभयो । प्रवचन तथा भजन संगितमा सहभागी हुनका लागि आफ्नो समय अनुकूल मिलाई यस क्षेत्रमा बसोबास गर्ने सबै हिन्दू धर्मावलम्बीहरुलाई पाण्डेले आह्वान गर्नुभएको छ । प्रत्येक दिन हुने प्रवचन र विशेष गरेर आईतबार हुने भक्ति भजनमा सयौं श्रद्धालु भक्तजनहरुको आगमन हुने रिपोर्टस् क्लव अमेरिकाका प्रतिनिधिलाई पाण्डेले जानकारी दिनुभयो । पाल्पा रामपुर निवासी आध्यात्मिक गुरु टंकनाथ अर्यालले अमेरिकामा आएर पनि यसरी भागवत गीता श्रवण र भजन संगितमा संलग्न हुन पाँउदा साह्रै खुशी लागेको र सामाजिक व्यक्तित्व डोलराज पाण्डे यस क्षेत्रमा बसोबास गर्ने नेपालीहरुलाई एकजुट गराई आध्यात्मिक बानीको विकास गराएकोमा पाण्डेलाई धन्यवाद व्यक्त गर्नुभयो ।
