विजय अधिकारी \ जुन ३, टोरोन्टो
क्यानडाकाे टोरोन्टो विविधताको शहर हो। यहाँ आउने जो कोहीले पनि विभिन्न सांस्कृतिक विविधताको अनुभव र अवलोकन गर्न सक्दछन। विभिन्न देशका परम्परा, जिवनशैलि, भेषभुषा, र संस्कृतिको सङ्गम रहेको प्रसिद्ध शहर टोरोन्टोमा नेपाली संस्कृति र नेपाल झल्काउने पर्व हुँदैछ- हिमालयन मेला। पर्व यसर्थमा कि यो उत्तर अमेरिकामा समग्र नेपाल र नेपालीपन लाई प्रतिनिधित्व गर्दै आयोजना हुने ठुलो मेला हो। विगत १६ वर्षदेखि आयोजना हुँदै आईरहेको यस मेला, सन् २००५ बाट आयोजना हुँदै आएको हो र आउँदो अगस्ट १०, २०२४ मा पनि टोरोन्टो, डाउनटाउनको नाथान फिलिप्स स्क्वायरमा आयोजना हुँदैछ।
•उत्तर अमेरिकी देश क्यानडामा आयोजना हुने “हिमालयन मेला” नेपाली संस्कृति , जीवनशैलि, भेषभुषा, परम्परा, खानाको परिकार अझ समग्रमा भन्नुपर्दा नेपालीपनको आभास गराउने मनोरञ्जनात्मक कार्यक्रम हो। नेपाली समुदायको हकहित र नेपाली संस्कृतिको संरक्षण अनि प्रबर्द्धन गर्दै आएको सामाजिक संस्था एन सि सि एस (नेप्लीज क्यानडियन कम्युनिटि सर्भिसेस) ले आयोजना गर्ने यस मेला एउटा विसुद्ध सांस्कृतिक कार्यक्रम हो।
•उक्त मेलामा दर्शक र अवलोकन गर्नेहरुले मुख्यत; नेपाली संस्कृति झल्काउने नाच, गीत सङ्गीत, एवं यहाँ संचालित नेपाली रेस्टुरेन्टमा बनेका विभिन्न नेपाली खानाको परिकार, भेषभुषाका साथै स्थानीय कलाकार द्वारा विभिन्न नाचगान र प्रस्तुती देख्न सकिने जनाइएको छ। कार्यक्रममा नेपाली सुगम सङ्गीतकि सुप्रसिद्ध गायिका अन्जु पन्त अनि गायक तिलक बम मल्लको प्रस्तुति पनि रहनेछ।
गत वर्ष करिब आठ हजार भन्दा धेरैको उपस्थिति भएको उक्त मेलाले नेपाली संस्कृति र नेपाललाई अन्तरास्ट्रिय स्तरमा प्रबर्द्धन गर्ने आयोजक पक्षको विश्वास छ। मेलाले परदेशी भूमीमा जन्मिएका नयाँ नेपाली पुस्ताहरुमा पनि आफ्नो देश, कलासंस्कृति, जिवनशैली र देशभक्ति भाव जगाउन ठुलो भुमिका खेल्दै आएको र खेल्न सक्ने भन्दै ए.न.सि. सि.एस.का महासचिव सुदर्शन सापकोटाले यस्ता कार्यक्रमलाई स्थानिय सरकार, स्थानिय समुदाय, नेपाली समुदाय, नेपाली संघसंगठनहरुले सकारात्मक रुपमा हेर्दै आएको बताउनुभएको छ। नेपाली समुदाय अनि संघसंस्थाको सहयोग र हौसलाले यस्ता खालका सांस्कृतिक कार्यक्रमहरु विदेशी भूमीमा पनि सहजै सम्पन्न गर्न सकिईरहेको सापकोटाले बताउनुभयो। यसबाहेक नेपाली संस्कृति र परम्परालाई जोगाउन र प्रबर्द्धन गर्न यस्तै विभिन्न कार्यक्रमहरु आयोजना गर्ने सापकोटाको भनाई छ।
