टी- २० विश्वकपको रिपोर्टिङ्गका लागि टेक्सास आएका नेपाली पत्रकारहरुसंग टेक्सास क्षेत्रबाट संचालित मिडिया संवद्ध संघ संस्थाका पदाधिकारी तथा पत्रकारहरुले अन्तरक्रियात्मक भेटघाट गरेका छन् । जुन ४ तारिकका दिन विश्वकपको पहिलो प्रतिस्पर्धाका रुपमा टेक्सासको खेल मैदानमा उत्रदैं गरेको नेपाली टिमसंग नेपालबाट अमेरिका आएका पत्रकारहरुको स्वागत सहित टेक्सासमा अन्तरक्रियात्मक कार्यक्रमको आयोजना गरिएको हो ।
जुन ४ तारिक पहिलो प्रतिस्पर्धाका रुपमा ड्यालसको ग्रान्ड प्रियरी मैदानमा उत्रदैं गरेको नेपाली टिमको स्वागतमा एनआरएनए अमेरिकाले रात्रिभोज कार्यक्रमको आयोजना गरेको केही समय पछि टेक्सासका संचारकर्मीहरुले खेल समाचार संप्रेषणका निम्ती नेपालको प्रतिनिधित्व गरेर अमेरिका आएका पत्रकारहरुसंग खेल केन्द्रित विभिन्न विषयगत छलफल गरेका छन् ।
अन्तरक्रिया कार्यक्रममा सहभागी रिपोर्टर्स क्लवका अध्यक्ष किशन रेग्मीले कार्यक्रमबारे जानकारी दिंदै प्रवासी नेपाली संचारकर्मी र मातृभूमिबाट रिपोर्टिङ्गका लागि अमेरिका आएका पत्रकार विचको यस अन्तरक्रियाले समाचार संप्रेषणका सवालमा मात्र नभई पेसागत धर्म, आत्मियता र आपसी भाईचारा संस्कारलाई पनि दर्साउने हुँदा आपसी सहकार्यका लागि यस अन्तरक्रियालाई यहाँका संचारकर्मीले महत्वका साथ हेरेका छन् ।
जुन १ देखि २९ सम्म अमेरिका र वेस्ट इन्डिजमा हुने टी-२० विश्वकपका लागि नेपाली टिमका तर्फबाट विश्वकप खेल्न रोहितकुमार पौडेलको कप्तानीमा आसिफ शेख, अनिल साह, कुशल भुर्तेल, कुशल मल्ल, दीपेन्द्रसिंह ऐरी, ललित राजवंशी, करण केसी, गुलसन झा, सोमपाल कामी, प्रतिश जीसी, सन्दीप जोरा, अविनाश बोहरा, सागर ढकाल र कमलसिंह ऐरी रहेका छन् ।
टी-२० विश्वकपमा नेपाल समुह डी मा रहेको छ । यस समुहमा नेपालसहित दक्षिण अफ्रिका, बंगलादेश, श्रीलंका र नेदरल्याण्डस रहेका छन् । विश्वकपमा नेपालले पहिलो खेल जुन ४ मा नेदरल्याण्डससँग, जुन ११ मा श्रीलंकासँग, जुन १४ मा दक्षिण अफ्रिकासँग र जुन १६ मा बंगलादेशसँग खेल्ने तालिका रहेको छ ।
