श्री केश ११ औं म्यूजिक खबर म्यूजिक अवार्डमा गायिका अन्जु श्रेष्ठले लोक गीत तर्फको अवार्ड हात पारेकी छन् । काठमाडौंमा सम्पन्न अवार्ड समारोहमा गायिका श्रेष्ठले नहेर न त्यसरी कान्छा बोलको गीतबाट सर्वोत्कृष्ट लोक गीत तर्फको अवार्ड प्राप्त गरेकी हुन् ।
अवार्ड कमिटीले मार्च अन्तिम साता सार्वजनिक गरेको सवोत्कृष्ट ५ मनोनयनमा लोक गीत तर्फको अवार्डका लागि गायक विरही कार्की, राज ढंगोल र गायिका कल्पना काफ्ले र रोजिना परियारसंग प्रतिस्पर्धामा रहेको गायिका श्रेष्ठको ‘नहेर न त्यसरी कान्छा’गीत अवार्ड समारोमा सर्वोत्कृष्ट घोषित भएको हो । अवार्डका लागि यस गीत सम्पादन तर्फपनि नोमिनेशनमा रहेको थियो ।
करिव १ दशक देखी निरन्तर नेपाली संगीत क्षेत्रमा क्रियाशिल गायिका श्रेष्ठको शब्द र अभिनयमा समेत धेरै गीत सार्वजनिक छन् । विभिन्न अवार्डबाट सम्मानित उनका यस अघि ढाका टोपी, आँखा बन्द, खोजिरहेछु, नहेरेझैं गर्ने लगायतका विभिन्न विधाका गीतहरु सार्वजनिक छन् । हरेक बर्ष तिज गीत सार्वजनिक गर्दै आएकी श्रेष्ठका सिउँदोमा सिन्दुर, रातो साडि, तिजको लहर, भेलवेटको चोली रंगीयो तिजले लगायतका गीतहरु समेत सार्वजनिक भने केही साता पहिले मात्रै श्रेष्ठको खोला जस्तो जिन्दगी गीत सार्वजनिक भएको छ ।
सम्पन्न अवार्ड समारोहमा ५१ हजार रुपैयाँ नगद राशीको दीर्घ साधना सम्मानद्वारा प्रतिष्ठित गीतकार चुडामणि देवकोटालाई नगदसहित सम्मानित गरिएको छ भने म्यूजिक खबर डायस्पोरा संगति सम्मानबाट पप सम्राट ओम बिक्रम विष्ट, अशोक कुमार राई, म्यूजिक खबर दशक संगीत सम्मानबाट लोकप्रिय गायक राजु परियार र लोकप्रिय गायिका रिता थापा मगर, म्यूजिक खबर युवा प्रतिभा संगीत सम्मानबाट चर्चित गायक तथा संगीतकार बैकुण्ठ महत, म्यूजिक खबर बालप्रतिभा प्रोत्साहन सम्मानबाट बाल गायक अशोक दर्जीलाई सम्मानित गरिएको थियो ।
त्यस्तै ५,५५५ रुपैयाँ धनराशीको म्यूजिक खबर संगीत पत्रकारिता सम्मानबाट पत्रकारद्वय डब्बु क्षत्री र सुदर्शन प्रसाद आचार्य सम्मानित भएका छन् भने म्यूजिक खबर सामाजिक व्यक्तित्व सम्मानबाट प्रवासमा रहेर सफल सामाजिक छवि बनाएका विष्णु शाही ठकुरीलाई सम्मानित गरिएको छ ।
समारोहमा बरिष्ठ गायिका तीर्थ कुमारी थापा, देविका बन्दना गीतकार राजेन्द्र थापा, कवि तथा पूर्व मन्त्री एसपी कोइराला, पहिलो नेपाली नायिका भुवन चन्द, बरिष्ठ अभिनेत्रीहरु बसुन्धरा भुसाल, चैत्यदेवी सिंह लगायका थुप्रै अग्रज कला तथा संगीतकर्मीहरुको बाक्लो उपस्थिती रहेको थियो ।
