गैरआवासीय नेपाली नागरिकताको पूर्ण कार्यान्वयनका सम्बन्धमा विशेष अन्तरक्रिया कार्यक्रम सम्पन्न भएको छ । एनआरएनए आईसीसी अध्यक्ष डा बद्री केसीको नेतृत्वमा आयोजित अन्तरक्रिया कार्यक्रम नेपालका गृह सहितका विभिन्न मन्त्रिहरुसंग सामुहिक छलफल सहित सम्पन्न भएको हो ।
गृहमन्त्री रमेश लेखक संविधानसभा सदस्यहरु वरिष्ठ अधिवक्ता राधेश्याम अधिकारी, डा. खिमलाल देवकोटा, राष्ट्रिय सभाका पूर्व सदस्य राम नारायण बिडारी र पूर्व महान्यायधिवक्ता अग्नि प्रसाद खरेल सहितका मन्त्रिहरु आमन्त्रित कार्यक्रममाअधिकार प्राप्त गैरआवासीय नेपाली नागरिकता विषयक छलफल भएको थियो ।
एनआरएनएले सरकारले आर्थिक, सामाजिक र सांस्कृतिक अधिकार सहित नागरिकताको व्यवस्था गरेता पनि अझै उक्त अधिकार प्राप्त हुन नसकेको भन्दै सरकारलाई ध्यानाकर्षण गराएको थियो । संविधानतः गैरआवासीय नेपालीहरुले नागरिकता प्राप्त गरिरहेको भएपनि त्यसमा उल्लेखित अधिकारहरु प्राप्त नभएको भन्दै अधिकार प्राप्त गैरआवासीय नेपाली नागरिकताको माग गरिएको थियो ।
गैरआवासीय नेपाली नागरिकता लिने क्रममा सम्बन्धित निकायहरुमा अझ केही अस्पष्टता देखिएकोले नागरिकता लिनको लागि समस्या भएको जानकारी दिँदै एनआरएनएले नागरिकता प्राप्त गरिसकेपछि पनि सामाजिक, सांस्कृतिक र आर्थिक अधिकारको पूर्ण प्रयोग गर्न नपाएको प्रति ध्यानाकर्षण गराईएको हो ।
कार्यक्रममा अध्यक्ष डा केसीले ठूलो संघर्षपछि सरकारले नागरिकता प्राप्तीको लागि बाटो खुला गरेको भएपनि सम्बन्धित निकायमा समयमै परिपत्र नहुँदा समस्या भोग्नु परेको यथार्थ बताएका थिए ।
त्यस्तै गृहमन्त्री लेखकले सरकारले गैर आवासीय नेपाली नागरिकताको कार्यान्वयनमा देखा परेका समस्या समाधान गर्दै सम्बन्धित निकायमा छिट्टै आवश्यक परिपत्र गर्ने प्रतिबद्धता व्यक्त गरेका छन् ।
कार्यक्रमका अन्य वक्ताले समेत गैरआवासीय नेपाली नागरिकताको पूर्ण कार्यान्वयनमा देखा परेका कानूनी अड्चन हटाउन सक्दो पहल प्रतिवद्धता जनाएको अन्तरक्रियामा नेपालको विद्यमान कानुनमा रहेका समस्याहरु, कानुन तथा नियमावली संशोधनका उपायहरु तथा अध्यागमन, मालपोत, बैंक तथा अन्य व्यवहारिक ठाउँका समस्या तुरुन्त समाधानका लागि बृहत छलफल गरिएको थियो ।
कार्यक्रममा संघका अध्यक्ष डा. केसी सहित, उपमहासचिव सोम सापकोटा, सहकोषाध्यक्ष कृष्ण तिमिल्सेना, एसिया प्यासिफिक क्षेत्रीय संयोजक हरि भट्टराई, सल्लाहकार अतुल कोइराला, संस्थापक अन्तर्राष्ट्रिय संयोजक भीम उदास, पूर्व उपाध्यक्ष (एनसीसी बेल्जियम) तीर्थ धमला, प्रमुख कार्यकारी अधिकृत राजेन्द्र कुमार राउत अधिकृत कुनाल मिश्र,संघका तर्फबाट गैरआवासीय नेपाली नागरिकताका फोकलपर्शन सरोज दाहाल लगायतको उपस्थिति रहेको थियो ।
