सुष्मा देवकोटा

केही दिन अघि मात्र नेपालका वरिष्ठ कलाकार मदनकृष्ण श्रेष्ठको नयाँ गीत सार्वजनिक भएको छ । कलाकार श्रेष्ठको स्वर तथा अभिनयमा रहेको “पिर्लुङ पिपिरी” बोलको गीतमा उनिसँगै युगल आवाज तथा कलाकार श्रेष्ठकी छोरीको भूमिकामा सँगै अभिनय गरेकी सुन्दरी गायिकाको नाम हो सदीक्षा कट्टेल ।

नेपाली साङ्गीतिक रियालिटी शो नेपाल आईडल सिजन -२ बाट नै चर्चामा आएकी गायिका सदीक्षा नेपाल आईडल सिजन -३ बाट थप चर्चा सहित नेपाली साङ्गीतिक क्षेत्रमा उदाएकी गायिका हुन् । जसको स्वरसँगै सौन्दर्यको चर्चा उनलाई देख्ने जो कोहिले गर्दछन् । उनि नेपाल आईडल सिजन २ मा जाँदाबाट नै सुन्दरी गायिकाको ट्याग सहित चर्चामा आएकाले धेरै प्रशंसकहरुको चाहना पनि थियो सदिक्षालाई अभिनयमा देख्ने । दर्शकको चाहना अनुरुप उनले मदन कृष्ण श्रेष्ठसँगको पहिलो अभिनयबाट आफुलाई कला क्षेत्रको थप श्रृंखलामा जोडेकी छन् ।

बुवा अविकेशर कट्टेल र आमा लिला कट्टेलकी सन्तानको रुपमा विराटनगरमा जन्मिएकी गायिका सदीक्षा उनकी दिदी समिक्षा कट्टेलको विश्वासको नतिजा हुन् । सानी सदीक्षाका लागि गायन उनको संभावना र दिदीको सपना थियो जतिबेलाबाट उनले गाउन सुरु गरिन् । संगीतमा गहिरो लगाव भएकी उनकी दिदीले आफु भन्दा सानी सदीक्षालाई स्कुलका स्टेजमा उभ्याउन गरेको मेहनतको नतिजा हुन्, देशका चर्चित रियालिटी शो हुँदै कयौँ सम्मानित स्टेजमा उभिएकी आजकी गायिका सदीक्षा कट्टेल ।

सानैबाट आफु भन्दा ठुला दाई दिदीबाट राम्रो गाउने बहिनी भनेर प्रशंसा कमाउँदै अघि बढेकी सदीक्षाको प्रशंसा आज देश विदेशमा रहेका ख्यातिप्राप्त कलाकर्मीहरुले गरिरहँदा उनको परिवार र उनकी संगीत सारथी दिदी समिक्षा अझ धेरै खुसी देखिन्छन् ।

अहिले सम्म फुलबारी, जय हो, लाखे, दयारानी र ह्रश्व दीर्घ गरी ५ वटा नेपाली चलचित्रका गीतमा आवाज भरेकी सदीक्षाले विभिन्न विधा अन्तर्गत रहेर १०० भन्दा माथिको संख्यामा गीतहरु गाएकी छिन् ।
सर्वाधिक सफल मध्येको एक दक्षिण भारतिय चलचित्र पुष्पाको बहु-चर्चित गीत सामी सामीको कभर गरेकी उनको आवाजको तारिफ भारतिय कलाकर्मी र श्रोताहरूले समेत गरेका थिए । सो गीतमा उनको सौन्दर्य र गायनको संयोजनले ठुलो तारिफ बटुलेको थियो । जसको फलस्वरुप केही समय अघि मात्रै चर्चित बलिउड कलाकार आदित्य नारायण झासँग उनको सहकार्य भएको छ । आदित्य नारायण र सदीक्षाको आवाजमा रहेको गीत सार्वजनिकको तयारीमा रहेको छ ।

भर्सटाईल सिङ्गरको छवि बनाएकी सदीक्षाले हाल सम्म नेपाली बाहेक भोजपुरी मैथिली, हिन्दी गीतहरुमा आवाज भरेकी छन् । नेपाली लोक आधुनिक, पप, सेमी क्लासिकल, क्लासिकल, आईटम, कौडा, टप्पा सबै खालका गीतहरु गाउन सक्ने खुवि भएकी सदीक्षाले अहिले सम्म नेपालका प्रसिद्ध गायक तथा संगीतकर्मीहरुसँग काम गरेकी छन् । यम बराल, आलोक श्री, राजु लामा, राजनराज सिवाकोटी, काली प्रसाद बास्कोटा, मदन कृष्ण श्रेष्ठ लगायतका गायकहरुसँग सहकार्य गरेकी उनको आवाजको पकड सबै प्रकारका गीतमा देखिन्छ ।

नेपाल आईडल पछि रेकर्ड भएको उनको पहिलो गीत फर्कि फर्कि नै सर्वाधिक सफल भएपछि उनको आवाजको अन्दाज नेपाली साँगीतिक क्षेत्रमा प्रभाव सहित स्थापित भएको हो । गायक नविन रावलसँगको युगल आवाजमा रहेको यो गीत करोड क्लवको सफल यात्रा पार गर्दै १ करोड ६० लाख माथिका दर्शक र हजारौँ सकारात्मक प्रतिकृया समेट्न सफल गीत हो । तर यो गीत औपचारिक गायनका हिसावले उनको पहिलो गीत भने होईन । उनी नेपाल आईडलमा आउनु अघि नै उनको तिहार विशेष गीत रेकर्ड भै सकेको थियो ।

अहिले जस्तो सोसियल मिडियाको विस्तार भै नसकेको समयमा जन्मिएकी सदिक्षाले रेडीयो र टेलिभिजनमा बज्ने अग्रज गायक गायिकाको आवाजको सुर र लयमा आफुलाई समाहित गरेकी हुन् । औपचारिक संगीत शिक्षा नलिएकी उनको आवाजको जादुले उनको खुबिलाई दर्साउ्रँछ ।

वि सं २०७० सालमा आफ्नो थप अध्ययन र संगीतलाई संगै लिएर विराटनगरबाट काठमाडौं आएकी सदिक्षाको वितेका १० बर्षलाई फर्केर हेर्दा उनको प्राय सबै समय संगीतकर्ममा नै बितेको देखिन्छ ।
फर्की फर्की, माया रैछ र, चोरी चोरी, उठेर नाचिस्व लगायतका दजनौं गीत उनलाई चिनाउन मद्यत गरेका गीतहरु हुन् । हरेक गीतहरुले आ आफ्नै भाग्य लिएर जन्मेका हुन्छन् भन्ने विश्वास राख्ने गायिका सदिक्षाका यस बर्ष पछि केही गीतहरु सार्वजनिक भै सकेका छन् भने विभिन्न संगीतकर्मीसंगको सहकार्यमा नयाँ गीतहरु पनि रेकडिङ र सार्वजनिकको तयारीमा रहेका छन् ।