२०८१ भदौ २३ गते आइतवार, (Sep 8 Sunday )
देवदहको पहिलो सन्चार माध्यम देवदह सन्देश भित्ते पत्रिकाका प्रधानसम्पादक तथा रिपोर्टर्स क्लब अमेरिकामा सक्रिय कार्यकारिणी सदस्य अर्जुन न्यौपानेसँग देवदह प्रेस क्लबका सदस्यहरुसँग साक्षात्कार कार्यक्रम देवदह खैरेनी पाठक फूडल्याण्ड रुपन्देहीमा सम्पन्न भएको छ ।
कार्यक्रममा देवदहको संचार क्षेत्र र यसको ऐतिहासिक पृष्ठभूमि देखि हालसम्मका विवध संचार माध्यम र गतिविधिलाई समिक्षा गरिएको थियो । कार्यक्रममा लुम्बिनी विकास कोषका कोषाध्यक्ष तथा प्रमुख अतिथि सिद्धिचरण भट्टराईले देवदह क्षेत्रमा संचार सेवा र पत्रकारिता एवम् पत्रकार उत्पादनको पृष्ठभूमिलाई प्रकाश पार्नुभएको थियो । संचार माध्यमहरु देवदह सन्देश भित्तेपत्रिका ,रेडियो देवदह र बुटवलबाट प्रकाशित हुने जनसंघर्ष दैनिक जस्ता संचार गृहमा रहेर विगतका
सहकर्मीहरूसँगको कुशल सहकार्यको स्मरण गर्दै आफू अमेरिका रहेर त्यहाँको संचार क्षेत्र रिपोर्ट क्लब अमेरिकाको कार्यकारिणी सदस्यमा रही सक्रिय कार्य गरिरहेको न्यौपानेले जानकारी गराउनु भयो। देवदहमा संचार क्षेत्रसँग रहेर सहकार्य गर्ने ईच्छा र आवश्यकता अनुसार अनुभव साटासाटलाई निरन्तरता दिईरहनुपर्नेमा न्यौपानेको जोड रहेको थियो ।
देवदह प्रेस क्लबको स्थापना र महत्वपूर्ण गतिविधिको बारेमा स्पष्ट पार्दै अमेरिकामा रहेका संचार माध्यमसँग सहकार्य गर्दै संचारका विविध कार्य संचालन गर्नेतर्फ आफु अत्यान्तै उत्साहित रहेको प्रेस क्लबका अध्यक्ष विष्णुप्रसाद पोखरेलले विचार व्यक्त गर्नु भयो । देवदह क्षेत्रमा विगतका दिनहरुमा संचारकर्मी साथीहरुले तत्कालिक परिवेशमा भोग्नु परेका विभिन्न चुनौति र सहकार्यमा रहेका साथीहरुको स्मरण गर्दै आफू जुनसुकै पेसा र व्यवसायमा लागे पनि सबै संचारकर्मी साथीहरु संचारका माध्यमहरुमा जोडिएर निरन्तरता दिनु सान्द्धर्विक रहेको प्रेस क्लवका सल्लाहकार पवन पौडेले बताउनु भयो ।
प्रविधिको विकासले संसार दिनानुदिन नजिक रहेको र भौगोलिक दुरी टाढा भएता पनि संचार माध्यमबाट हामी नजिक रहेको उल्लेख गर्दै हामी जहाँ रहेता पनि सहकार्यमा आवद्ध रहन सकिने कुरा प्रेस क्लवका सल्लाहकार रमेश कुमार पोख्रेलले व्यक्त गर्नु भयो ।
कार्यक्रममा पत्रकार टंक सुनारले संचार क्षेत्र र समसामयिकताको बारेमा विचार व्यक्त गर्नुभयो ।
प्रेस क्लवका अध्यक्ष विष्णुप्रसाद पोखरेलको अध्यक्षतामा भएको कार्यक्रममा सचिव निर्मल थापाको संचालन तथा सल्लाहकार पत्रकार गोविन्द घर्तीमगरको समेतको उपस्थिति रहेको थियो ।
