टेक्सस, अमेरिका –
झापा राजगढ स्थायी निवासी तथा हाल अमेरिकाको टेक्ससमा बसोबास गर्दै आएकी लक्ष्मी ढुंगानाले गैरआवासीय नेपाली संघ (NRNA) अमेरिका टेक्सस च्याप्टरको आगामी निर्वाचनका लागि महिला उपाध्यक्ष (W) पदमा उम्मेदवारी घोषणा गरेकी छिन्।
शंकरदेव क्याम्पसबाट बी.बी.एस. (BBS) पास गरेकी ढुंगाना हाल अमेरिकन नागरिक हुन्। सामाजिक संजालमार्फत उम्मेदवारीको जानकारी दिँदै उनले एनआरएनए सदस्यता अभियानलाई सफल बनाउन योगदान पुर्याउने सम्पूर्ण सदस्यहरूप्रति धन्यवाद व्यक्त गरिन्।
उनको फेसबुक पोस्टमा भनिएको छ,
“NRNA NCC USA को सदस्यता अभियानलाई सफल बनाउन सहयोग गर्नु भएका सम्पूर्ण सदस्यहरूलाई हार्दिक धन्यवाद। तपाईंहरूको साथ, सहयोग र सहभागिताले हाम्रो नेपाली समुदायलाई अझ बलियो र एकताबद्ध बनाउन यात्रामा ठूलो प्रेरणा दिएको छ।”
साथै उनले आगामी दिनहरूमा पनि समुदायको साथ, समर्थन र सल्लाहको अपेक्षा राखेको जनाइन्।
लक्ष्मी ढुंगाना दुई छोरीकी आमा हुन्। उनका श्रीमान् दीपेन्द्र गुरागाईं हाल एनआरएनए टेक्सस च्याप्टरका अध्यक्ष हुन्। सामाजिक सेवामा रुचि राख्ने ढुंगाना झापाली समाज टेक्ससकी केन्द्रिय सदस्यसमेत रहेकी छिन्।
रिपोर्टर्स क्लब अमेरिका सँगको कुराकानीमा उनले भनिन्,
“नेतृत्वमा महिला पुरुषभन्दा कमजोर छैनन् भन्ने देखाउन म तयार छु।”
श्रीमान सामाजिक योगदान र नेतृत्वबाट प्रेरित हुँदै आफू पनि उम्मेदवारीमा उत्रिएको उनले स्पष्ट पारिन्।
एनआरएनए टेक्सस च्याप्टरको आगामी निर्वाचनमा लक्ष्मी ढुंगानाको उम्मेदवारीले महिलाको सक्रिय सहभागिता र नेतृत्वको सशक्त उपस्थिति झल्काउने विश्वास लिइएको छ।
