डालास, अमेरिका — जुलाई ११:
गैरआवासीय नेपाली संघ (NRNA) राष्ट्रिय समन्वय परिषद् (NCC) अमेरिका अन्तर्गत टेक्सास च्याप्टरको आगामी कार्यकालका लागि रामप्रसाद अधिकारीले उपाध्यक्ष पदमा आफ्नो उम्मेदवारी घोषणा गरेका छन्।
१० वर्षभन्दा बढी समय बन, वन्यजन्तु तथा पर्यटनको क्षेत्रमा कार्यानुभव हासिल गरेका अधिकारीले सहकारीका विभिन्न उपसमिति तथा सामाजिक संस्थाहरूमा रहेर पनि सक्रिय भूमिका निर्वाह गरिसकेका छन्। अमेरिकामा रहेर नेपाली समुदायका गतिविधिहरूलाई रिपोर्टर्स क्लब अमेरिकाको बरिस्ठ उपाध्यक्ष पदमा रहेर पत्रकारितामार्फत सम्प्रेषण गर्दै आएका उनले NRNA NCC USA को पर्यटन उपसमितिमा समेत योगदान पुर्याइसकेका छन्।
हाल Himalayan Dallas Sports Lions Club मा समेत सक्रिय सदस्यका रूपमा कार्यरत अधिकारीले आफ्नो बहुआयामिक अनुभवलाई संस्थागत विकासमा लगाउने प्रतिबद्धता जनाएका छन्।
“एक चोटिको नेपाली, सधैँको नेपाली” भन्ने नारासहित चुनावी मैदानमा उत्रिएका अधिकारीले गुटउपगुटको राजनीति अन्त्य गर्दै एकता र सहकार्यमा आधारित नेतृत्वको आवश्यकता औंल्याएका छन्। उनले भने, “एनआरएनएलाई व्यक्तिगत सत्ता खेल नभई सबै नेपालीहरूको साझा संस्था बनाउनु मेरो लक्ष्य हो।”
गुटबन्दी, स्वार्थी गठबन्धन र विगतका विवादहरूको अन्त्य गर्दै एनआरएनएलाई पुनः गौरवमय बनाउने अठोटका साथ, उनले टेक्सास च्याप्टरका सम्पूर्ण सदस्यहरूलाई MIS प्रणालीमार्फत सदस्यता लिएर सबल नेतृत्व चयन गर्न आह्वान गरेका छन्।
“संस्था फेरि गैरआवासीय नेपालीहरूको गौरव बनोस् — हाम्रो एकता र मतकै भरमा,” अधिकारीले जोड दिए।
NRNA NCC USA (Texas Chapter) को निर्वाचन प्रक्रिया चाँडै औपचारिक रूपमा सुरु हुने अपेक्षा गरिएको छ। रामप्रसाद अधिकारी अहिले उपाध्यक्ष पदका उम्मेदवारका रूपमा चर्चामा छन्।
