राम प्रसाद अधिकारी , डल्लास टेक्सास
गैरआवासीय नेपाली संघ (NRNA) अमेरिकाको राष्ट्रिय समन्वय परिषद् (NCC USA) को २०२५–२०२७ कार्यकालका लागि नेपालको धादिङ जिल्लाको नीलकण्ठ नगरपालिका निवासी तथा हाल अमेरिकाको टेक्सास राज्यको फोर्ट वर्थमा बसोबास गर्दै आएका सन्तोष लम्सालले बोर्ड अफ डाइरेक्टर्स पदमा आफ्नो उम्मेदवारी घोषणा गरेका छन्।
नेपालमा रहँदै राजनीतिक तथा सामाजिक क्षेत्रमा सक्रिय लम्साल आगामी अगस्ट १६ र १७, २०२५ मा हुने निर्वाचनमा प्रतिस्पर्धा गर्नेछन्। “नेपालका लागि नेपाली” र “युवा रूपान्तरण” को आवश्यकता रहेको भन्दै उनले प्रवासी नेपालीहरूको भावना अनुसारका कार्यक्रम सञ्चालन गर्ने उद्देश्यका साथ उम्मेदवारी दिएको बताए।
पछिल्ला पाँच वर्षदेखि टेक्सासलाई आफ्नो कर्मथलो बनाएका लम्साल यहाँको नेपाली समुदायबीच सामाजिक सेवामा सक्रिय रहेर छुट्टै पहिचान बनाउन सफल व्यक्ति मानिन्छन्। उनीसँग सामाजिक कार्यको लामो अनुभव रहेको छ भने २०२१–२०२३ मा एनआरएनए टेक्सास च्याप्टरको सदस्यका रूपमा पनि जिम्मेवारी सम्हालिसकेका छन्।
संस्थागत सुधार, युवाको सहभागिता तथा नेपाली समुदायको हकहितका सवालमा सशक्त भूमिका निर्वाह गर्ने लक्ष्य राखेका लम्साल एनआरएनए अमेरिका भित्र सहकार्य र एकताको भावना बलियो बनाउन प्रतिबद्ध छन्।
चुनावी सरगर्मी तीव्र बन्दै गएको यस समयमा सशक्त र ऊर्जाशील युवा उम्मेदवारको रूपमा सन्तोष लम्सालको मैदानमा उपस्थितिले निर्वाचनलाई थप प्रतिस्पर्धात्मक र सार्थक बनाउने समुदायको अपेक्षा छ।
