अगस्ट ११, अमेरिका — गैर आवासीय नेपाली संघ (एनआरएनए) अमेरिकाका अध्यक्ष विकास उप्रेतीले हालै सम्पन्न निर्वाचनपश्चात उत्पन्न विवादमा अनधिकृत गतिविधि नगर्न र नगराउन चेतावनी दिएका छन्।
गत जुलाई २८ मा सम्पन्न एनआरएनए अमेरिकाको निर्वाचनबाट निर्वाचित अध्यक्ष उप्रेतीले अमेरिकाबासी नेपाली समुदायलाई धन्यवाद ज्ञापन गर्दै केही व्यक्तिहरूले आइसिसीको सदस्यता विवरण गैरकानुनी रूपमा प्रयोग गरेको आरोप लगाए। उनका अनुसार, निर्वाचनका क्रममा डा. अर्जुन बञ्जाडेको नेतृत्वमा भएको अनियमितताका कारण आइसिसीले तत्कालीन नेतृत्वको आवद्धता रद्द गरिसकेको थियो।
उप्रेतीले आइसिसीको सिस्टममा रहेको सदस्यताको सूची र विवरण सार्वजनिक गरेर तथा अनाधिकृत रूपमा प्रयोग गरेर “कथित चुनाव” गराउने प्रयास गैरकानुनी भएको दाबी गरेका छन्। उनले सदस्यता शुल्क वापत तिरिएको रकम र विवरणको दुरुपयोग पाए कानुनी प्रक्रियाबाट असुलउपर गरिने चेतावनी पनि दिए।
साथै, उनले साधारण सभाको नाममा नेपाल सरकारका प्रतिनिधि र प्रदेशका मुख्यमन्त्रीलाई समेत गुमराहमा पारी बोलाउने कार्यको विरोध गर्दै, प्रमुख अतिथि बन्न प्रचारित मुख्यमन्त्री सुरेन्द्र पाण्डेलाई विवादमा नपर्न आग्रह गरेका छन्।
उप्रेतीले अन्त्यमा आग्रह गर्दै भने, “गैरकानुनी रूपमा चलिरहेको संस्थालाई मान्यता दिने प्रयास कसैले पनि नगरोस्।”
