टेक्सास, अमेरिका – नेपाली समाज टेक्सास (NST) का वरिष्ठ सदस्य तथा पूर्व उपाध्यक्ष बलराम पौडेलले आगामी कार्यकाल (२०२५–२०२७) का लागि अध्यक्ष पदमा आफ्नो उम्मेदवारी औपचारिक रूपमा घोषणा गरेका छन्।
पौडेल २०११ देखि समाजमा सक्रिय सदस्यका रूपमा संलग्न छन्। उनले २०१३ र २०२१ मा कार्यकारी सदस्य र २०२३ मा उपाध्यक्षको जिम्मेवारी निर्वाह गरिसकेका छन्। लामो समयसम्मको योगदान, नेतृत्व अनुभव र समुदायप्रतिको प्रतिबद्धताको मूल्यांकन गर्दै, उनले आफूलाई सो पदका लागि योग्य उम्मेदवारका रूपमा प्रस्तुत गरेका हुन्।
समाजप्रतिको आफ्नो यात्राबारे बोल्दै पौडेलले नेतृत्व टोली, सदस्य परिवार तथा समुदायजनबाट प्राप्त समर्थन, विश्वास र सहकार्यप्रति आभार व्यक्त गरे। उनले यो १५ वर्षको सक्रिय संलग्नतामा नेपाली मन्दिर ट्रस्टी, Blood Donors of America, Lions Club International लगायतका सामाजिक संस्थामा सेवा गर्दै समुदायका आवश्यकता, प्राथमिकता र सम्भावनालाई नजिकबाट बुझ्ने अवसर पाएको बताए।
पौडेलका अनुसार यही अनुभव र सिकाइका आधारमा उनले आगामी कार्यकालमा NST लाई अझै गतिशील, समावेशी, परिणाममुखी र सबैको प्रतिनिधित्व गर्ने सक्षम संस्थाका रूपमा अघि बढाउने लक्ष्य राखेका छन्।
उम्मेदवारी घोषणा गर्दै पौडेलले भने,
“समुदायप्रतिको तपाईंहरूको माया, विश्वास, समर्थन र साथले सदैव प्रेरणा दिएको छ। आगामी दिनमा अझै इमानदार, पारदर्शी र जिम्मेवार भएर समुदायको सेवामा समर्पित रहँदै समाजलाई नयाँ उचाइमा पुर्याउने प्रतिबद्धता व्यक्त गर्दछु।”
अन्त्यमा उनले सदस्य तथा समुदायजनप्रति धन्यवाद व्यक्त गर्दै निरन्तर सुझाव, मार्गदर्शन र सहकार्यको अपेक्षा गरेका छन्।
बलराम पौडेल
अध्यक्ष पदका उम्मेदवार
नेपाली समाज टेक्सास (NST)
कार्यकाल: २०२५–२०२७
