राम प्रसाद अधिकारी
टेक्सस, अमेरिका — नेपाली समाज टेक्सस (NST) को आगामी निर्वाचनका लागि किरण पौड्यालले अध्यक्ष पदमा उम्मेदवारी दिने घोषणा गरेका छन्। एनएसटीको नयाँ नेतृत्व चयन गर्न डिसेम्बर १३ मा मतदान हुने भएको छ।
पौड्यालको उम्मेदवारी सार्वजनिक भएपछि टेक्ससको नेपाली समुदायमा चुनावी चर्चा तीव्र बनेको छ। उनलाई प्रवासी नेपाली मञ्च टेक्सस, विभिन्न मन्दिर, गुम्बा, चर्च, युवागोष्ठी तथा स्थानीय सामाजिक संस्थाहरूको समर्थन रहेको बताइएको छ।
नेपाल–अमेरिका अन्तर्राष्ट्रिय चलचित्र महोत्सवका अभियन्ता समेत रहेका पौड्याल एनएसटीका पूर्व उपाध्यक्ष तथा वर्तमान प्रवक्ता हुन्। संस्थामा उनले लामो समय स्वयंसेवकका रूपमा पनि योगदान दिएका छन्। संस्थाको “गरिमा र लक्ष्यप्रति अविचलित रहेर काम गरेको” कारण उनी अध्यक्ष पदमा प्रस्तुत भएको पौड्यालले बताए।
सन् २०१३ देखि एनएसटीमा सक्रिय पौड्याल समाजसेवा, सांस्कृतिक प्रवर्द्धन तथा संस्थागत सुदृढीकरणमा निरन्तर सक्रिय व्यक्तित्व मानिन्छन्।
उनले समुदायका विभिन्न संघ–संस्थाका प्रतिनिधिलाई समेटेर नेपाली प्रधानमन्त्री तथा परराष्ट्र मन्त्रीसँग भेट गरी डलासमा नेपाली महावाणिज्यदूतावास स्थापनाका लागि पहलसमेत गरेका थिए।
अमेरिका आउनु अघि पौड्याल पत्रकारिता र फिल्म निर्माणमा सक्रिय थिए। उनले दासढुंगा, गुडबाई काठमाडौँ लगायतका चलचित्रका सहनिर्माता तथा नेपाल–अमेरिका फिल्म सोसाइटीका संस्थापक उपाध्यक्षका रूपमा समेत सेवा गरेका छन्।
