राम प्रसाद अधिकारि ,
अमेरिकाको टेक्सास राज्यको डेन्टनमा रहेको डेन्टन छठपुजा समिति ले आगामी वर्षहरूमा छठपुजालाई अझ दिगो, व्यवस्थित र स्थायी रूपमा सञ्चालन गर्न आफ्नै नाममा जग्गा खरिद गर्ने निर्णय गरेको छ।
नोभेम्बर १६ मा डेन्टन छठपुजा समिति र डेन्टन नेपाली समाजबीच सम्पन्न संयुक्त बैठकले छठपुजाको दीर्घकालीन व्यवस्थापनका लागि डेन्टनमै जग्गा खरीद प्रक्रिया अघि बढाउने घोषणासहित निर्णय पारित गरेको छ।
सन् २०१० देखि डेन्टनमा छठपुजाको आयोजना गर्दै आएका स्थानीय समाजसेवी अमरनाथ शाहले जनाएअनुसार अमेरिकामा जन्मिएका बालबालिकालाई आफ्नो कला, संस्कृति र परम्परासँग जोडिराख्न तथा समुदायमा छठपुजालाई अझ व्यवस्थित रूपमा अगाडि बढाउन यो कदम उठाइएको हो।
शाहका शब्दमा, “अमेरिकामा रहेर पनि आफ्ना संस्कार, संस्कृतिको रक्षा गर्नु आवश्यक छ। नयाँ पुस्तालाई हाम्रो धार्मिक तथा सांस्कृतिक पहिचान सिकाउँदै लैजानुपर्ने भएकाले दीर्घकालीन योजनासहित छठपुजाका लागि जग्गा खरिद प्रक्रिया अघि बढाइएको हो।”
समितिको नयाँ योजनाले नेपाली समुदायमा उत्साह थपिएको छ।
