राम प्रसाद अधिकारी –
अमेरिकाको Texas मा रहेका नेपाली समुदायबीच अहिले Nepalese Society of Texas (NST) को आगामी कार्यकाल (२०२५–२०२७) का लागि हुने निर्वाचनलाई लिएर चुनावी माहोल तातेको छ। झन्डै ६ हजार २ सय सदस्य रहेको संस्थामा डिसेम्बर १३ मा मतदान हुने तय छ।
यसपटकको चुनावमा विजय भुषाल र जनक भण्डारी नेतृत्वको दुई छुट्टाछुट्टै प्यानल प्रतिस्पर्धामा उत्रिएका छन्। सहमतिको लागि केही समय प्रयास भए पनि कुरा नमिलेपछि दुबै उमेदवारले पूर्ण प्यानल नै बनाएर चुनावी मैदानमा होमिएका हुन्।
१६ पदका लागि ३३ उम्मेदवार
निर्वाचन समितिका अनुसार यसपटक १६ वटा पदका लागि ३३ जनाले उम्मेदवारी दर्ता गराएका छन्। दुबै प्यानलबाट प्रस्तुत पदाधिकारी सूची यसप्रकार छ:
विजय भुषाल प्यानल
वरिष्ठ उपाध्यक्ष: जीवलाल भुषाल
उपाध्यक्ष: दिलीप राई
महिला उपाध्यक्ष: शान्ता गिरी
महासचिव: प्रविस श्रेष्ठ
सचिव: नारायण केसी
कोषाध्यक्ष: प्रेम थापा
जनक भण्डारी प्यानल
वरिष्ठ उपाध्यक्ष: चण्डी भण्डारी
उपाध्यक्ष: गुञ्जन भण्डारी
महिला उपाध्यक्ष: राधिका खराल
महासचिव: रामकृष्ण यादव
सचिव: सुशील बर्तौला
कोषाध्यक्ष: भोला मैनाली
माया–सद्भावसँगै फेरि एकपटक साथ–सहयोगको हार्दिक अनुरोध – जनक भण्डारी
सामाजिक संजाल फेसबुकमा आफ्ना भनाइ राख्दै भण्डारी लेख्नु हुन्छ –
हजुरहरूको अपार माया, सद्भाव, सहयोग र बहुमूल्य मतदानका कारण मैले नेपाली समाज टेक्सासमा दुई कार्यकालसम्म सेवा गर्ने अवसर पाएँ। यसको लागि म हजुरहरू सबैप्रति हृदयदेखि आभारी छु।
अब, यही ऊर्जा र विश्वासका आधारमा, आगामी डिसेम्बर १३, शनिबारका दिन हुन लागेको निर्वाचनमा म तथा मेरो सम्पूर्ण टोली फेरि एकपटक हजुरहरूको साथको अपेक्षासहित मैदानमा उभिएका छौँ।
आजदेखि नै, म मेरो साथीसँगै हजुरहरू सबैको अभिभावकको भूमिका निष्ठापूर्वक निर्वाह गर्ने प्रण गर्दछु। समाजको हित, एकता, विकास र पारदर्शिताका लागि निरन्तर काम गर्ने प्रतिबद्धतासहित हामी अघिबढिरहेका छौँ।
अनुभवका आधारमा अघि बढेको भुषालको दाबी
नेतृत्वका प्रतिस्पर्धी विजय भुषालले एक कार्यकाल सदस्य र अर्को कार्यकाल महासचिवको रूपमा संस्थामा काम गरिसकेको अनुभव आफूलाई अघि बढ्ने प्रेरणा भएको बताए। उनले टेक्सासमा रहेका नेपाली समुदायका समस्यामा सदैव सहयोग गर्दै आएको उल्लेख गर्दै, “समाज विकास र हकहितका लागि भूमिकामा रहेर जिम्मेवारीपूर्वक काम गर्छु,” भने।
भुषालले आफू निर्वाचित भएमा प्रतिस्पर्धी प्यानलका साथीसँग पनि सहकार्य गर्दै संस्थालाई अझ बलियो बनाउने प्रतिबद्धता व्यक्त गरे।
