आगामी डिसेम्बर १३, शनिबार हुने एनएसटी (नेपाली समाज टेक्सस) को निर्वाचन मिती नजिँकिंदै जाँदा उम्मेदवारहरूले प्रचार–प्रसारलाई थप गति दिएका छन्। सामाजिक सञ्जालमा मेसेन्जर समूह सक्रिय हुँदै गएको छ भने फेसबुकभरि चुनावी ब्यानर, भेटघाट कार्यक्रम र प्रचार सामग्रीले स्थान ओगट्न थालेका छन्।
यसबीच व्यक्तिगत तथा सामूहिक भेटघाट कार्यक्रमहरू पनि निरन्तर भइरहेका छन्। यो वर्षको निर्वाचनमा मुख्य रूपमा वर्तमान वरिष्ठ उपाध्यक्ष जनक भण्डारी समूह र वर्तमान महासचिव विजय भुषाल समूह गरी दुई प्यानलबीच प्रतिस्पर्धा देखिएको छ।
आज हॉल्टम सिटीस्थित Indian Kitchen को सभाकक्षमा जनक भण्डारी समूहले ड्यालस–फोर्ट वर्थ क्षेत्रमा कार्यरत पत्रकारहरूसँग अन्तरक्रिया कार्यक्रम सम्पन्न गरेको छ।
कार्यक्रममा बोल्दै अध्यक्ष पदका उम्मेदवार जनक भण्डारीले नेपाली समाज टेक्ससप्रति समुदायको आकर्षण बढाउन आफू प्रतिवद्ध रहेको बताए।
“यदि म निर्वाचित भएँ भने समुदायका समस्या पहिचान गरी समुदायसँगै मिलेर समाधानमुखी काम गर्नेछु,” उनले भने।
त्यस्तै महासचिव पदका उम्मेदवार रामकृष्ण यादवले समाजलाई प्रचारभन्दा बढी आपतकालीन सेवा र वास्तविक सहयोग आवश्यक रहेको उल्लेख गरे।
“कामभन्दा बढी फेसबुक प्रचारमा समय खर्चिनुपर्ने हुँदैन; राम्रो काम गरे समुदायले नै प्रचार गर्छ,” यादवले भने।
यादवले सक्षम समाज निर्माणमा मिडियाको भूमिकालाई महत्वपूर्ण बताउँदै
“मिडिया बलियो भयो भने समुदायलाई आवश्यक र सही सूचना प्रवाह गर्न सकिन्छ,” उल्लेख गरे र आफ्नो समूह मिडियासँग मिलेर कार्य गर्ने प्रतिबद्धता व्यक्त गरे।
