राम प्रसाद अधिकाकरी
टेक्सस — नेपाली समाज टेक्सस (NST) को आसन्न निर्वाचनका लागि अध्यक्ष पदका उम्मेदवार विजय भुसालले आफ्नो छोटो तथा दीर्घकालीन एजेन्डा सार्वजनिक गरेका छन्। इर्भिङस्थित भेटघाट रेस्टुरेन्टमा गएको शुक्रबार आयोजित विशेष कार्यक्रममा उनले समुदाय केन्द्रित योजना र प्राथमिकताहरू प्रस्तुत गरेका हुन्।
कार्यक्रममा नेपाली समुदायका पत्रकार, स्थानीय सामाजिक व्यक्तित्व तथा विभिन्न पदका उम्मेदवारहरूको उल्लेखनीय उपस्थिति रहेको थियो। एजेन्डा सार्वजनिक गर्दै उम्मेदवार भुसालले स्वास्थ्य, शिक्षा, संस्कृति, युवासशक्तिकरण, रोजगारी, सामाजिक सेवा र दीर्घकालीन भौतिक संरचनाको विकासलाई आफ्नो मुख्य कार्यदिशा बनाउने प्रतिबद्धता जनाए।
उक्त अवसरमा पत्रकारहरूको तर्फबाट रिपोर्टर्स क्लब अमेरिका का अध्यक्ष किशन रेग्मी, नेजा (NEJA) का अध्यक्ष सुरज भण्डारी लगायत संचारकर्मी तथा पत्रकारहरू मनोज जोशी, ओम आचार्य, सागर अर्याल, बिमल बराल आदिले उम्मेदवारलाई विभिन्न सुझाव, प्रश्न तथा जिज्ञासाहरू राखेका थिए। पत्रकारहरूको सुझावलाई सकारात्मक रूपमा ग्रहण गर्दै भुसालले समुदायसँग सल्लाह, सहकार्य र पारदर्शी नेतृत्व आफ्नो प्राथमिकता हुने बताए।
उम्मेदवार भुसालले प्रस्तुत गरेको एजेन्डामा स्वास्थ्य क्याम्प, मानसिक स्वास्थ्य सेवा, नयाँ आप्रवासी सहयोग, आपतकालीन कोष वृद्धि, कानुनी परामर्श, युवा नेतृत्व विकास, खेलकुद कार्यक्रम, तथा दीर्घकालमा सामुदायिक भवन, ज्येष्ठ नागरिक केन्द्र र खेलकुद केन्द्र स्थापना जस्ता विषयहरू समावेश छन्।
कार्यक्रम समापनमा सहभागीहरूले यस्तो विचार–केन्द्रित र खुला संवादमूलक कार्यक्रमले चुनावी माहोललाई सकारात्मक बनाउने भन्दै उम्मेदवारलाई सफलताको शुभकामना व्यक्त गरेका थिए।
