राम प्रसाद अधिकारी
टेक्सास (अमेरिका) — नेपाली समाज टेक्सास (NST) को नयाँ कार्यकाल २०२६–२०२७ का लागि हुन गइरहेको निर्वाचन नजिकिँदै जाँदा उम्मेदवारहरूको गतिविधि बढ्दो क्रममा रहेको छ। यही सन्दर्भमा टिम विजयबाट कोषाध्यक्ष पदका उम्मेदवार प्रेम थापा (आदित्य) ले आफ्नो उम्मेदवारीलाई समुदाय सेवा, पारदर्शिता र इमानदार अर्थ व्यवस्थापनसँग जोड्दै अघि सारेका छन्।
आगामी डिसेम्बर १३, शनिबार हुने निर्वाचन श्री पशुपतिनाथ तथा बुद्ध बिहार, युलेस (Texas) मा आयोजना हुँदैछ। यस निर्वाचनमा अध्यक्ष पदका लागि दुई समूहबीच प्रतिस्पर्धा हुँदैछ—एक समूहबाट विजय भुसाल र अर्को समूहबाट जनक भण्डारी उम्मेदवार रहेका छन्।
नुवाकोट जिल्लाको दुम्चे स्थायी घर भएका प्रेम थापा सन् २०२२ मा अमेरिका प्रवेश गरेका हुन्। नेपालमा रहँदा बैङ्किङ सेक्टरको प्रशासनिक क्षेत्रमा विशेष अनुभव हासिल गरेका उनले अमेरिका आएपछि पनि finance सम्बन्धित क्षेत्रमै संलग्नता जनाउँदै आएका छन्, जसले संस्थाको आर्थिक नेतृत्वका लागि उनलाई सक्षम उम्मेदवार बनाएको समर्थकहरूको भनाइ छ।
आध्यात्मिक रूपमा ओशोका सन्यासी समेत रहेका थापाले नैतिकता, इमानदारी र पारदर्शितालाई आफ्नो जीवनशैली र नेतृत्वको आधार मान्दै आएका छन्। उनले संस्थाको आर्थिक जिम्मेवारी सम्हाल्ने अवसर पाएमा एक पैसा पनि व्यक्तिगत स्वार्थका लागि प्रयोग नगर्ने र गर्न नदिने स्पष्ट प्रतिबद्धता व्यक्त गरेका छन्।
नेपाली समाज टेक्सासप्रति अध्यक्ष पदका उम्मेदवार विजय भुसालको निरन्तर सक्रियता, त्याग र समर्पणबाट आफू प्रभावित भएको बताउँदै थापाले सोही सामाजिक अग्रसरताका कारण टिम विजयसँग आबद्ध भएर चुनावी प्रतिस्पर्धामा उत्रिएको बताएका छन्।
अनुभव, इमानदार सोच र स्पष्ट दृष्टिकोणका साथ अघि बढिरहेका प्रेम थापा (आदित्य) लाई यसपटकको निर्वाचनमा जिताउनैपर्ने उम्मेदवार का रूपमा हेरिएको छ। आर्थिक पारदर्शिता र संस्थागत विश्वास मजबुत बनाउन उनको उम्मेदवारी महत्वपूर्ण हुने विश्वास नेपाली समुदायले व्यक्त गरेको छ।
