राम प्रसाद अधिकारी , ड्यालस, अमेरिका —
गैरआवासीय नेपाली संघ (एनआरएनए) राष्ट्रिय समन्वय परिषद् अमेरिका (NRNA NCC USA) को मिडिया कोर्डिनेटर पदमा पत्रकार किशन रेग्मी नियुक्त हुनु भएको छ।
एनआरएनए एनसीसी अमेरिकाको जनवरी ४, २०२६ मा सम्पन्न छैटौँ कार्यकारी समितिको बैठकको सर्वसम्मत निर्णयअनुसार रेग्मीलाई सन् २०२५–२०२७ कार्यकालका लागि मिडिया कोर्डिनेटरको जिम्मेवारी प्रदान गरिएको हो।
लामो समयदेखि पत्रकारिता र सञ्चार क्षेत्रमा सक्रिय रहँदै आएका रेग्मी हाल रिपोर्टर्स क्लब अफ अमेरिकाका अध्यक्ष समेत रहनु भएको छ। उहाँको पत्रकारिता अनुभव, संस्थागत नेतृत्व क्षमता तथा नेपाली समुदायप्रतिको समर्पणलाई मध्यनजर गर्दै उक्त जिम्मेवारी दिइएको एनआरएनए एनसीसी अमेरिकाले जनाएको छ।
मिडिया कोर्डिनेटरको हैसियतमा रेग्मीले एनआरएनए एनसीसी अमेरिकाको सञ्चार रणनीति, मिडिया समन्वय, सूचना प्रवाह तथा संस्थागत गतिविधिहरूलाई प्रभावकारी रूपमा अघि बढाउने अपेक्षा गरिएको छ। साथै, उहाँको नेतृत्वले एनआरएनए र विश्वभर फैलिएको गैरआवासीय नेपाली समुदायबीचको सञ्चार सम्बन्धलाई अझ सुदृढ बनाउने विश्वास लिइएको छ।
एनआरएनए एनसीसी अमेरिकाले नवनियुक्त मिडिया कोर्डिनेटर किशन रेग्मीलाई सफल कार्यकालको शुभकामना व्यक्त गर्दै संस्थाको लक्ष्य र अभियानमा उहाँको महत्वपूर्ण योगदान रहने अपेक्षा व्यक्त गरेको छ।
